Iłan Mask prezientavaŭ taksi-bieśpiłotnik — biez rula i piedalaŭ
Na Cybercab Mask efiektna padjechaŭ da studyi, dzie prachodziła mierapryjemstva, i padčas vystupu nazvaŭ hetuju madel «maleńkaj kamfortnaj haścioŭniaj».
12.10.2024 / 14:20
Iłan Mask pradstaviŭ inviestaram Tesla pratatypy bieśpiłotnych taksi budučyni — dvuchmiesny aŭtamabil Cybercab biez rula i piedalaŭ i šmatmiesny Robovan, raźličany na 20 čałaviek, piša Bi-bi-si.
Na Cybercab Mask efiektna padjechaŭ da studyi Warner Bros Studios, dzie prachodziła mierapryjemstva, i padčas vystupu nazvaŭ hetuju madel «maleńkaj kamfortnaj haścinaj».
Jon abviaściŭ, što košt Cybercab składzie mienš za 30 tysiač dalaraŭ. Ich vytvorčaść kampanija płanuje pačać da 2027 hoda ŭ vialikich abjomach, kali vynachodnictva atrymaje adabreńnie rehulataraŭ. Na schodzie inviestaraŭ była pradstaŭlena ekśpierymientalnaja partyja z 50 aŭtamabilaŭ.
Pa słovach Maska, biaśpieka jaho bieśpiłotnych madelaŭ budzie ŭ 10 razoŭ vyšejšaja, čym u mašyn z kiroŭcam. Vyklikać takija taksi karystalniki zmohuć z dapamohaj dadatku.
Madel Robovan, pa słovach kiraŭnika Tesla, pryznačana nie tolki dla pieravozki ludziej, ale i hruzaŭ, i stanie niezamiennym aŭtamabilem jak dla kampanij, tak i dla siamiejnaha karystańnia. Žurnalisty, jakija prysutničali na prezientacyi, paraŭnoŭvajuć Robovan z futurystyčnaj madellu ź filmaŭ fentezi.
«Budučynia pavinna vyhladać jak budučynia», — skazaŭ Mask.
Abiedźvie madeli — Cybercab i Robovan — majuć ahulnyja rysy ź pikapam Cybertruck, jaki Tesla vypuściła ŭ 2023 hodzie i nazyvaje svaim kanceptualnym aŭtamabilem.
Z taho času, jak 5 krasavika kampanija Tesla abviaściła ab budučaj prezientacyi robataksi, jaje akcyi vyraśli na 45 %.
Pa słovach Maska, jon pierakanany, što aryjentacyja, jakuju ŭziała Tesla na aŭtamabili-bieśpiłotniki i štučny intelekt, moža pavysić košt kampanii da 5 tryljonaŭ dalaraŭ, što prykładna ŭ siem razoŭ pieravyšaje jaje biahučuju rynkavuju vartaść.
Usia prezientacyja ŭ Warner Bros Studios była aformlena ŭ styli futuryzmu. Na placoŭcy, padobnaj na vielizarny akvaryum, tancavali robaty-humanoidy Optimus. Mask paabiacaŭ, što takija čałaviekapadobnyja robaty rana ci pozna pastupiać u masavuju vytvorčaść i buduć kaštavać mienš za 30 tysiač dalaraŭ.
Adnak, niahledziačy na ŭsio heta, piša Financial Times, inviestary i ekśpierty ŭ cełym zastalisia niezadavolenyja sustrečaj. Pa ich słovach, usio, što jany ŭbačyli, adnosicca da doŭhaterminovaj pierśpiektyvy, a pa sutnaści na siońniašni dzień nie było prapanavana ničoha kankretnaha.
Robovan
Haret Nielsan, analityk CFRA Research, skazaŭ, što ŭ Tesla, vidać, niama jasnaj kancepcyi na bližejšuju budučyniu, i heta nie moža nie rasčaroŭvać. U pryvatnaści, ad Iłana Maska čakali prapanoŭ pa madyfikacyi siedana Model 3. Akramia taho, inviestary adznačajuć, što prezientacyja Model 2, jakaja była pradstaŭlena na tym ža mierapryjemstvie ŭ Łos-Andželesie i zapusk jakoj zapłanavany na 2025 hod, akazałasia nie pierakanaŭčaj.
U cełym, śpiecyjalisty ličać, što asartymient isnujučaj pradukcyi Tesla sastareŭ. «My ličym, što hetaja padzieja [prezientacyja bieśpiłotnych taksi] mała što źmianiła ŭ niaprazrystych siarednieterminovych pierśpiektyvach prybytku», — skazaŭ Haret Nielsan.
Iłan Mask daŭno imkniecca stać pieršym biźniesmienam, jaki napoŭnić vulicy haradoŭ taksi-bieśpiłotnikami, ale dahetul jamu nie ŭdavałasia pierajści ad słoŭ da spraŭ. Upieršyniu jon publična zahavaryŭ ab svaich płanach amal 10 hadoŭ tamu, paabiacaŭšy, što da kanca 2017 hoda amierykancy zmohuć karystacca pasłuhami robataksi. U 2019 hodzie jon zajaviŭ, što da 2020-ha na darohach ZŠA budzie adzin miljon takich aŭtamabilaŭ.
U 2024 Mask znoŭ abiacaje praryŭ. Jon zapeŭniŭ inviestaraŭ, što ŭžo ŭ nastupnym hodzie taksi-bieśpiłotniki mohuć stać dastupnymi ŭ Techasie i Kalifornii, kali rehulujučyja orhany nie buduć stvarać pieraškody.
U cełym, śpiecyjalisty ličać ideju masavaha servisu robataksi całkam realnaj, ale miarkujuć, što Tesla spatrebicca dla hetaha jašče jak minimum niekalki hadoŭ, uličvajučy pytańni narmatyvaŭ i biaśpieki.
Analityki kampanii Jefferies zajavili paśla apošniaj prezientacyi, što Mask nie daŭ praviaralnych dokazaŭ dasiahnieńniaŭ Tesla u halinie aŭtanomnych technałohij.
Nad stvareńniem bieśpiłotnych aŭtamabilaŭ taksama ščylna pracujuć takija kampanii, jak amierykanskaja Waymo i kitajskaja Baidu, ale i jany sutykajucca z takimi ž prablemami ŭ śfiery biaśpieki, što i Tesla.
U asnovie ich technałohij lažać łaziernyja datčyki i vysokadakładnyja karty, jakija pieradajuć na panel kiravańnia abstanoŭku vakoł aŭtamabila, ale ich nadziejnaść pakul nie dakazanaja.
Prodažy aŭtamabilaŭ — asnoŭnaja śfiera prybytku Tesla, jakaja składaje kala 82 %. Ale ŭ apošni čas pakazčyki prybytku kampanii padajuć z-za ŭzrosłaj kankurencyi. Bolš dastupnyja prapanovy elektramabilaŭ ad kitajskich kampanij prymušajuć Tesla źnižać ceny.