Dźmitryjeŭ prosić viarnuć pasłoŭ u Minsk. «Sankcyi bjuć pa ludziach, a nie pa ŭładzie»
Były lidar kampanii «Havary praŭdu» Andrej Dźmitryjeŭ apublikavaŭ artykuł, u jakim krytykuje ŭsprymańnie Biełarusi jak «satelita Rasii» i zaklikaje Jeŭropu «hladzieć nie nazad, a napierad».
11.10.2024 / 18:56
U 2020 hodzie Andreja Dźmitryjeva zarehistravali ŭ jakaści kandydata na prezidenckich vybarach, razam z Hannaj Kanapackaj i Siarhiejem Čeračniem. Fota: Naša Niva
Artykuł Andreja Dźmitryjeva apublikavany na staronkach anłajn-časopisa «IPG — Mižnarodnaja palityka i hramadstva», jaki vydajecca niamieckim Fondam imia Frydrycha Ebierta.
Kandydat-spojler na prezidenckich vybarach 2020 hoda adznačaje, što, «niahledziačy na palityčny kryzis, try hady represij i vajnu la miežaŭ Biełarusi, mnohija ludzi praciahvajuć spadziavacca na budučyniu, dzie pavažajucca pravy čałavieka i isnuje svaboda vykazvańnia mierkavańniaŭ».
Pa słovach palityka, «biełarusy ŭžo prajšli svaju revalucyju ŭ 2020 hodzie. Jana adbyłasia ŭ sercach i śviadomaści ludziej. Ciapier narod prachodzić składany šlach da pieramien, jakija pavinny stabilizavać situacyju i pryvieści da žyćcia biez nasilla i novych uzrušeńniaŭ».
«I na hetym šlachu jon varty nie škadavańnia, a poŭnaj padtrymki», — piša Dźmitryjeŭ.
Na pohlad palityka, «biełarusy chočuć mirnych pieramien, jakija dazvolać vyzvalić palitviaźniaŭ i stvaryć umovy dla dyjałohu pamiž hramadstvam i ŭładaj, a taksama spynieńnia izalacyi krainy».
Sam Dźmitryjeŭ byŭ asudžany na paŭtara hoda źniavoleńnia pa palityčnych matyvach, adbyŭ svoj termin i vyjšaŭ na svabodu.
Jon adznačaje važnaść taho, kab Jeŭropa bačyła Biełaruś «jak niezaležnuju dziaržavu» i «hladzieła nie nazad, a napierad, hruntujučysia na svaich kaštoŭnaściach i metach».
«Meta — pabudova demakratyčnaj Biełarusi, nadziejnaha partniora ŭ rehijanalnaj biaśpiecy».
Aŭtar śćviardžaje, što «dla bolšaści ŭ krainie krajnie źniavažlivy pohlad na Biełaruś jak «satelita» Rasii i tym bolš akupavanuju terytoryju. Heta absalutna nie adpaviadaje rečaisnaści».
«Narod nie choča być raźmiennaj manietaj u hieapalityčnych hulniach, a imkniecca da taho, kab Biełaruś usprymali jak niezaležnuju i pavažanuju dziaržavu», — adznačaje aŭtar i nahadvaje pra nieabchodnaść «uzmacnieńnia niezaležnaści i stvareńnia ŭmovaŭ dla narmalnaha raźvićcia hramadzianskaj supolnaści».
Nahadajem, što paśla 2021 hoda ŭ Biełarusi byli likvidavanyja ŭsie niezaležnyja hramadskija arhanizacyi, a kiraŭniki ŭsich vialikich nacyjanalnych NDA abo stali abjektam kryminalnaha pieraśledu, abo pakinuli krainu. Siarod palitźniavolenych — suśvietna viadomy pravaabaronca, łaŭreat Nobieleŭskaj premii miru Aleś Bialacki.
«Biełarusam patrebnyja partniory, jakija ŭsprymajuć ich jak pierśpiektyŭnaha sajuźnika, a nie prablemu», — dadaje Dźmitryjeŭ.
Sankcyi suprać łukašenkaŭcaŭ bjuć pa ludziach, a nie pa ŭładzie, miarkuje Andrej Dźmitryjeŭ. Na fota: Alaksandr Łukašenka ŭ Maskvie 9 kastryčnika 2024 hoda
Jakich krokaŭ ad Jeŭropy čakaje Dźmitryjeŭ
Aŭtar zaklikaje da kankretnych krokaŭ, jakija b viali da vyzvaleńnia palitviaźniaŭ, spynieńnia represij i stvareńnia ŭmovaŭ dla palityčnaj razmarozki.
Adnym z takich krokaŭ jon bačyć viartańnie zachodnich dypłamatyčnych misij u Minsk.
«Heta nie tyčycca pryznańnia Łukašenki, a pryznańnia prava biełarusaŭ na svaju dziaržavu i taho, što biełarusy — heta častka jeŭrapiejskaj prastory», — arhumientuje Dźmitryjeŭ.
Jon źviartaje ŭvahu na niehatyŭny ŭpłyŭ sankcyj. Na jaho dumku, jany padšturchoŭvajuć ich da aryjentacyi na Uschod i asłablajuć suviazi ź Jeŭropaj.
U toj ža čas, piša Andrej Dźmitryjeŭ, «biełarusy nie chočuć całkam addalacca ad Jeŭropy — jany šukajuć bałans, jaki dazvolić im zastavacca častkaj jeŭrapiejskaj prastory i nie stać udzielnikami vajny».
Andrej Dźmitryjeŭ prapanuje, kab padtrymka Jeŭropy była nakiravanaja na ŭmacavańnie hramadzianskaj supolnaści i dapamohu biełarusam u zachavańni ich jeŭrapiejskaj identyčnaści.
«Dla mnohich jeŭrapiejskaja identyčnaść — heta nie tolki hieapalityčny vybar, ale i simvał narmalnaha žyćcia, dzie pavažajuć pravy čałavieka i jość mahčymaści dla samaraźvićcia», — padkreślivaje Dźmitryjeŭ.
Važnym jon ličyć najaŭnaść jeŭrapiejskich prahram dla studentaŭ i maładych prafiesijanałaŭ ź Biełarusi, adukacyjnych abmienaŭ i prajektaŭ, nakiravanych na raźvićcio miascovych inicyjatyŭ u krainie.
Usie pieraličanyja kroki, na jaho dumku, dapamohuć adnavić u biełarusaŭ «pačućcio ahulnaści i adzinstva».
«Padtrymka zvonku pavinna vyhladać nie jak umiašańnie, a jak dapamoha ŭ zachavańni suviazi ź Jeŭropaj i intehracyi ŭ kulturnuju i ekanamičnuju prastoru. Čym bolš takich suviaziaŭ udasca stvaryć, tym macniejšymi buduć demakratyčnyja pamknieńni ŭnutry krainy i tym ciažejšym budzie ŭładam izalavać Biełaruś ad źniešniaha śvietu», — miarkuje aŭtar.
«Va ŭmovach pastajannaha nadzvyčajnaha stanovišča, cisku i strachu (…) biełarusy nie zdajucca. Jany imknucca zachavać svaje pryncypy i kaštoŭnaści: miralubnaść, pracavitaść, hodnaść, vieru ŭ budučyniu svajoj krainy. I heta zasłuhoŭvaje pavahi i padtrymki — jak z boku Jeŭrapiejskaha sajuza, tak i ŭsiaho Zachadu», — reziumuje Dźmitryjeŭ.
Dźmitryjeŭ zapisaŭ pieršy storyz paśla vyzvaleńnia z turmy — biełaruskamoŭny vierš
Andrej Dźmitryjeŭ: Pakul nie vieru, što ja na voli