U škole pad Minskam pracuje nastaŭnik — dvajnik Džoni Depa
U vieraśni biełaruski TikTok uzarvaŭ rolik: nastaŭnik na školnaj liniejcy syhraŭ niekali papularny chit Despacito i sabraŭ tysiačy zachoplenych kamientaroŭ u sacsietcy. Karystalniki zachaplalisia talenavitym piedahoham i paraŭnoŭvali jaho z Džoni Depam. Nastaŭnikam akazaŭsia bałałaječnik-virtuoz ź sielskaj škoły — 44-hadovy Dźmitryj Strež. Pra jaho piša Tochka.by.
11.10.2024 / 11:20
Fota tut i dalej: Tochka.by
Niezvyčajnaja škoła
Škoła ŭ ahraharadku Novy Dvor nie zusim zvyčajnaja, z estetyčnym uchiłam. Tut absalutna ŭsie vučni paśla asnoŭnych urokaŭ zajmajucca tvorčaściu: muzykaj, chareahrafijaj, lepkaj, malavańniem.
Dyrektar škoły Dźmitryj Tryfanaŭ nie biez honaru kaža: zaniataść na muzyčnym kirunku — 100%.
«Usie našy dzieci zajmajucca nie tolki vučobaj, ale jašče i estetykaj. U nas šmat biaspłatnych hurtkoŭ. Usiaho 14 abjadnańniaŭ pa intaresach», — raskazvaje kiraŭnik.
Na pierapynkach tut zaŭsiody muzyčna. Z kožnaha kłasa hučać instrumienty. Pa čaćviarhach ładziać muzyčnyja pierapynki: usie spuskajucca ŭ faje, hraje muzyka, dzieci i nastaŭniki tančać. Pa sieradach — pierapynki ź biełaruskimi matyvami: narodnymi pieśniami, tancami, uborami.
«Dzieciam vielmi padabajecca. U nas nievialikaja, ale vielmi družnaja škoła — usiaho 208 dzietak», — pravodzić ekskursiju namieśnica dyrektara pa vychavaŭčaj rabocie Alena Citova.
I ŭ takoj škole, akramia nastaŭnikaŭ-pradmietnikaŭ, pracuje jašče šmat tvorčych piedahohaŭ. Mienavita jany zachapili dziaciej zaniatkami muzykaj.
Ledź nie staŭ bas-hitarystam
Dźmitryj Strež pracuje ŭ Navadvorskaj škole 15 hadoŭ.
Jon staŭ nastaŭnikam muzyki ŭ 24 hady, adrazu paśla zakančeńnia kansiervatoryi. Bałałajka — instrumient nietypovy i, zdajecca, naŭrad ci moh by sabrać natoŭpy achvotnych hrać na im. Ale ŭ Dźmitryja ad vučniaŭ adboju niama.
«Bałałajka — taki instrumient, jaki ŭžo adnym svaim vyhladam jak byccam prosić prabačeńnia za svajo isnavańnie», — žartuje vykładčyk.
Šmat hadoŭ tamu jon abraŭ hety instrumient vypadkova. Kali pryjšoŭ na prasłuchoŭvańnie, nastaŭniki spytali: na čym chočaš hrać?
«A ja navat nie viedaŭ, jakija naohuł instrumienty byvajuć. I pra bałałajku ničoha nie viedaŭ. Prosta jakraz u hety dzień ubačyŭ mulcik — tam hrali na bałałajcy. Ja razhubiŭsia i vybraŭ. Nastaŭniki, viadoma, uzradavalisia, tamu što na hety instrumient zaŭsiody mała achvotnych, piedahoham nie chapaje nahruzki», — uspaminaje Dźmitryj.
Heta ciapier jaho vučni z honaram niasuć bałałajku na plačy i vychvalajucca pierad adnahodkami ihroj na niezvyčajnym instrumiencie. A tady kožny pachod u muzykałku ŭ maleńkaha Dźmitryja supravadžaŭsia kučaj kpinaŭ.
«Idzieš praz dvary, dzieci hulajuć, a ty z hetaj bałałajkaj. Davodziłasia dzieści pastajać za svoj honar i adpor dać, i dzieści pramaŭčać», — kaža nastaŭnik.
Pośpiechi junaha bałałaječnika zaŭvažyli adrazu. Jon chutka pačaŭ udzielničać u konkursach, zajmaŭ pryzavyja miescy. Hraŭ tak, što palcy źbivaŭ u kroŭ. Ale praciahvaŭ uparta zajmacca.
Z budučaj prafiesijaj vyznačyŭsia adrazu — budzie muzykam. Vyrašyŭ pastupać u muzyčnuju vučelniu, potym u kansiervatoryju. Ale zatym ledź było nie zdradziŭ lubimamu instrumientu i amal staŭ bas-hitarystam.
Z muzykanta — u dastaŭščyka picy
Vykładčyki i ŭ vučyliščy, i ŭ kansiervatoryi, uspaminaje Dźmitryj, byli vydatnyja. Jany pracavali ź im, što nazyvajecca, «nie łamajučy aparat» — nie pieravučvali, nie pierasadžvali, nie pierastrojvali jaho ihru na bałałajcy.
Ale ŭ niejki momant Dźmitryj zachapiŭsia bas-hitaraj — taki junacki zapoj rok-muzykaj. Bałałajka — niesurjozna ž niejak. Navat chacieŭ kinuć kansiervatoryju i pieravieścisia ŭ «Kulek» na estradnaje adździaleńnie.
«Nu a niejak dziaŭčyna mnie spadabałasia, taksama muzyka. Kali jana daviedałasia, što ja bałałaječnik, sumnieŭna da hetaha pastaviłasia: maŭlaŭ, niešta «nie pacanskaje». Praŭda, mnie potym udałosia jaje pierakanać, zvodziŭ na paru kancertaŭ. Stała majoj žonkaj u vyniku», — śmiajecca Dźmitryj.
Paśla kansiervatoryi — raźmierkavańnie ŭ zvyčajnuju škołu z estetyčnym uchiłam. Tady, pryznajecca Dźmitryj, było ciažka.
«Dzieci dla mianie byli jak ź inšaj płaniety. Jak znajści padychod, čym zacikavić, jak naohuł nabrać hrupu na taki nietypovy instrumient? Heta ciapier ja ŭžo razumieju ich, kali svaje dzieci jość, adčuvaju ich nastroj, stomlenaść, mahu vyklikać prychilnaść, zacikavić. A tady ŭsio heta było dla mianie, jak ciomny les», — kaža Dźmitryj.
Paralelna pracavaŭ u fiłarmonii: jak u kožnaha muzykanta — «chałtury» i karparatyvy, vystupleńni. Jeździŭ navat padzarabić vuličnym muzykam pa Jeŭropie — u ich kole heta nazyvajecca «źjeździć na kamiani». Žyŭ, jak kaža,»viecier u hałavie». Niešta zarablaŭ.
Ale kali źjaviłasia svaja siamja, hrošaj stała nie chapać: muzyka — prafiesija niehrašovaja.
«Ja pajšoŭ u dastaŭščyki picy. I adčuŭ, što takoje hrošy. Heta było raz u 10 bolš, čym ja tady atrymlivaŭ. Ale pracavać davodziłasia ceły dzień z ranicy da viečara. Jašče paŭstaŭki ŭ škole pakinuŭ. Vytrymaŭ u takim režymie hod», — uspaminaje Dźmitryj.
Pierałomny momant zdaryŭsia, kali jamu patelefanavali z Navadvorskaj škoły. Uhavaryli pryjści pracavać, paabiacali dobruju nahruzku i hodny zarobak.
Z tych časoŭ i pracuje tut ź dziećmi, vučyć ich ihry na bałałajcy.
«Korol i Šut» na bałałajcy
Da jaho prychodu ŭ Navadvorskaj škole nie było kłasa pa bałałajcy. A ciapier na hety instrumient utvaryŭsia navat list čakańnia.
Dzieci prosta lubiać piedahoha. Prosiać navučyć novym miełodyjam — niadaŭna hrali saŭndtrek z «Pirataŭ Karybskaha mora», razvučyli sioje-toje z «Korola i Šuta». Kažuć, na bałałajcy možna «zbacać» usio što zaŭhodna.
«Viadoma, instrumient taki niepapularny, jon nie daść taki «vał», jak hitara. Ale ź im taksama možna rabić krutyja štuki, raskryć. Voś spačatku razvučvaješ ź dziećmi niešta sučasnaje, a potym i pa surjoznych rečach možna. A Bietchoviena viedaješ? A heta, a to? Tak i da kłasiki pryvučaješ — i dziciaci cikava», — dzielicca sakretami piedahoh.
Dźmitryj da raptoŭnaj papularnaści stavicca prosta: kaža, što dzieci — samyja ciažkija hledačy, spadabacca im składana. Na liniejcy chvalavaŭsia nie mienš, čym na kancercie.
Rady, što rolik u TikTok hledačam zajšoŭ: usio ž taki heta lišni raz pakazvaje, što bałałajka nie taki ŭžo praściacki instrumient.