«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami
«Naša Niva» znajšła intryhoŭnyja fakty ŭ čatach emihrantaŭ, pryśviečanych pošukam pracy i bytavym pytańniam. Pryčym nie tolki ŭ čatach biełaruskaj dyjaspary.
09.10.2024 / 19:10
Biełaruskaja emihracyja stała hałoŭnym abjektam uvahi łukašenkaŭskich śpiecsłužbaŭ. Ilustracyjnaje fota Artur Widak / NurPhoto via Getty Images
22 sakavika 2024 hoda ŭ roznych bytavych čatach biełaruskaj dyjaspary za miažoju źjavilisia adnatypnyja paviedamleńni.
Paviedamleńni ŭ čatach biełaruskaj dyjaspary
Niechta «Siarhiej» pisaŭ, što treba ludzi dla razavaj padpracoŭki. Zaniataść dźvie hadziny, a apłata pa vyniku.
Za dva dni, 24 sakavika, mieli adbycca akcyi z nahody Dnia Voli: marš u Varšavie i navukovy simpozium biełarusaŭ u Łondanie. «Siarhiej» prapanoŭvaŭ ludziam lohkija hrošy: pazdymać hetyja akcyi i dasłać videa (pad razovaj padpracoŭkaj mielisia na ŭvazie hetyja zadańni).
Pa toj ža schiemie šukali ludziej, hatovych sačyć za biełarusami ŭ Vilni.
Akaŭnt u telehramie, padpisany jak «Siarhiej», miescami jon fihuruje taksama jak «Siarhiej Piatroŭ», maje ID 5988969326 i biezabličny nik @gfst1297.
Hety «Siarhiej» usiudyisny. Jak toj fihara, jaki i tut, i tam, jon ustupiŭ va ŭsie mahčymyja čaty biełarusaŭ śvietu — navat tajłandski. Pryčym jon aktyvizuje svaju pracu: u vialikuju kolkaść čataŭ uvajšoŭ za apošnija dni.
Čaty, u jakich prysutničaje «Siarhiej»
Što «Siarhiej» pisaŭ u čaty dyjasparaŭ? Amal ničoha. Tolki repościŭ dopis pra toje, što Śledčy kamitet pačaŭ kryminalnuju spravu suprać Narodnych ambasadaŭ Biełarusi za miažoj — infarmacyju, jakaja zapałochvaje i adstrašvaje ad aktyŭnaści.
Publikacyja, jakuju pakinuŭ «Siarhiej» u čacie biełarusaŭ Niderłandaŭ
«Siarhiej» taki nie adzin. Padobnyja prykmiety maje i dahetul aktyŭny akaŭnt z ID 6868032872 i imieniem karystalnika alex060580. Hety pracuje vyklučna na biełaruskaj temie ŭ Litvie.
Mienavita ź jaho žurnalistu «Našaj Nivy» prapanoŭvali namalavać hrafici ŭ Vilni dy sfatahrafać parkoŭku Departamienta dziaržaŭnaj biaśpieki Litvy. A čarhovych amataraŭ padzarabić jon šukaŭ, naprykład, akurat napiaredadni napadu na biełaruskuju kramu Kropka.
Paviedamleńni pra pošuk pracy ŭ čatach emihrantaŭ u Litvie za 23 lipienia. Napad na biełaruskuju kramu Kropka ŭ Vilni adbudziecca ŭ noč z 27 na 28 lipienia
«Aleks» alex060580 pasiecca pieravažna ŭ čatach z pošukam pracy. Ciapier jon nie daje zadańniaŭ adrazu, a prapanuje spačatku sfotkacca na fonie Vilni i dasłać fota ŭ TH. Ale pracu jon usio jašče prapanuje.
Kali vy sutykalisia z takimi abviestkami, nazirali cikavyja fakty ci viedajecie bolš, pišycie redaktaru «Našaj Nivy» ŭ TH ci na nivanasha@proton.me. Abo lubomu redaktaru ci žurnalistu «Našaj Nivy», jakoha viedajecie asabista.
My ž na siońnia bačym, jak łukašenkaŭskija śpiecsłužby pracujuć prynamsi dvuma mietadami — pošukam ludziej niepasredna praz svaich supracoŭnikaŭ dy pošukam ludziej praź cieniavyja «biržy pracy». My majem zafiksavanyja fakty, što z akaŭntaŭ, ź jakich šukali ludziej dla śpiecapieracyj u Vilni, pracavali i pa nielehalnaj mihracyi dy nielehalnym biznesie ŭ krainach za miežami Jeŭrasajuza.
Kali vam važnaja praca, jakuju robiać žurnalisty «Našaj Nivy», padtrymajcie nas danatam praz «Patreon».