Z «Biełšyny» źniali jeŭrapiejskija sankcyi, ale jana praciahvaje pracavać na rasijskuju vajennuju mašynu
«Biełšyna» stała adnym ź niamnohich pradpryjemstvaŭ, jakim udałosia vykraślić siabie z sankcyjnaha śpisu Jeŭrasajuza: sud vyrašyŭ, što kampaniju biazdokazna abvinavacili ŭ finansavańni režymu Łukašenki i padtrymcy vajny Rasii suprać Ukrainy. Adnak Biełaruski rasśledavalnicki centr vyśvietliŭ, što paralelna z asprečvańniem sankcyj pradpryjemstva praciahvała pastaŭlać šyny rasijskaj armii, jak nikudy nie dziełasia i jahonaja poŭnaja paduładnaść režymu Łukašenki.
08.10.2024 / 20:00
Kałaž stvorany BRC z vykarystańniem ŠI
U 2024 hodzie Jeŭrapiejski sud źniaŭ sankcyi z «Biełšyny», pastanaviŭšy, što pradpryjemstva biez dakładnych dokazaŭ abvinavacili ŭ finansavańni režymu Łukašenki i padtrymcy vajny Rasii suprać Ukrainy. «Biełšyna» śćviardžała ŭ sudzie, što jana źjaŭlajecca dziaržaŭnym pradpryjemstvam, ale da momantu ŭviadzieńnia sankcyj niesła straty i nie mahła być surjoznaj krynicaj dachodu dla režymu Łukašenki. Sud pryznaŭ hetyja arhumienty i pryniaŭ rašeńnie na karyść kampanii.
Adnak rasśledavańnie, praviedzienaje Biełaruskim rasśledavalnickim centram, dakazvaje, što heta rašeńnie było pamyłkovym.
«Biełšyna» praciahvała pastaŭlać svaju pradukcyju, uklučajučy šyny dla vajskovaj techniki, Ministerstvu abarony Rasii, što śviedčyć pra jaje ŭdzieł u padtrymcy vajny va Ukrainie.
Unutry Biełarusi «Biełšyna» apošnim časam trapiła ŭ karupcyjny skandał. U 2023 hodzie hienieralny dyrektar pradpryjemstva Andrej Bunakoŭ byŭ aryštavany za toje, što pradavaŭ bujnahruzavyja šyny rasijskim pasiarednikam pa cenach nižejšych za sabiekošt. Łukašenka asabista abvinavaciŭ Bunakova ŭ tym, što toj zaklučyŭ niavyhadny dla «Biełšyny» kantrakt, u toj čas jak rasijskija pasiaredniki pierapradavali šyny z nacenkaj u 60%. Asablivuju ŭvahu vyklikaŭ fakt, što heta adbyvałasia na fonie sankcyj, kali popyt na biełaruskija šyny značna vyras paśla vychadu z rasijskaha rynku zachodnich kampanij.
Paśla skandału ad «Biełšyny» byli adchilenyja pasiaredniki, i ekskluziŭnyja pravy na raspaŭsiudžvańnie šyn u Rasii pierajšli da «Handlovaha doma BiełAZ», 45% akcyj jakoha naležyć Prezidenckamu spartyŭnamu kłubu pad kiraŭnictvam Dźmitryja Łukašenki, siaredniaha syna Alaksandra Łukašenki. Heta pryviało da pieraraźmierkavańnia kantrolu na rynku šyn na karyść siamji Łukašenki.
«Biełšyna» pastaŭlała šyny dla rasijskaj vajskovaj techniki praz svajho dylera «Biełnaftachim-Ras», jaki źjaŭlajecca dziaržaŭnaj biełaruskaj kampanijaj.
Pavodle danych rasśledavańnia BRC, tolki ŭ 2022—2023 hadach było zaklučana niekalki kantraktaŭ ź Ministerstvam abarony Rasii na ahulnuju sumu bolš za 1,5 miljarda rasijskich rubloŭ (kala 19,5 miljonaŭ dołaraŭ).
Šyny «Biełšyny» byli vyjaŭlenyja na vajskovaj technicy, jakaja ŭdzielničała ŭ bajavych dziejańniach va Ukrainie. Naprykład, na padmaskoŭnym forumie «Armija-2023» byli pradstaŭlenyja ŭzory vajskovaj techniki, u tym liku samachodnaja haŭbica «Malva» i sistema supraćpavietranaj abarony S-400, zabiaśpiečanyja šynami «Biełšyny». Hetaja technika vykarystoŭvajecca ŭ bajavych apieracyjach na Charkaŭščynie i dla abstrełu ŭkrainskich haradoŭ.
Takim čynam, choć «Biełšyna» i zmahła vyjhrać sud u Jeŭropie, rasśledavańnie BRC pakazvaje, što pradpryjemstva praciahvaje dziejničać u intaresach jak biełaruskaj ułady, tak i rasijskaj vajennaj mašyny.
Port dla Biełarusi ŭ Murmansku budzie budavać były dyrektar «Biełšyny», jakoha hod tamu aryštoŭvali
Jeŭrapiejski sud źniaŭ sankcyi z «Biełšyny»
Paraŭnali ceny na novyja zimovyja šyny ŭ Biełarusi, Polščy i Litvie. Vynik niečakany