У Гомелі будуць разглядаць заяву аб амністыі для палітзняволенай Алены Гнаўк
У суддзе Чыгуначнага раёна Гомеля на 10 кастрычніка запланавана пасяджэнне, дзе ў якасці падсуднай пазначаная палітзняволеная Алена Пятроўна Гнаўк. Сутнасць пасяджэння — разгляд заявы або хадайніцтва аб прымяненні амністыі. Весці працэс будзе Мікалай Крупадзёраў, піша «Гомельская вясна».
08.10.2024 / 18:22
Пакуль незразумела, чаму разгляд будзе адбывацца ў судзе Чыгуначнага раёна Гомеля, калі апошняе вядомае месца ўтрымання Алены Гнаўк — гэта калонія № 24 для паўторна асуджаных у Зарэччы Рэчыцкага раёна. Магчыма, яе з нейкай нагоды перавялі ў калонію № 4, якая якраз знаходзіцца ў Чыгуначным раёне Гомеля.
У траўні Гнаўк павінны былі перадаць у калонію ў Зарэчча лекі, бо яна мела праблемы са здароўем. Але перадаць гэтыя лекі не атрымалася і надалей звестак ад яе не было. Магчыма, здароўе жанчыны пагоршылася і яе перавялі ў калонію № 4 пасля таго.
67-гадовую Алену Гнаўк, актывістку з Пружан, судзілі ўжо чатыры разы. Першы раз яе асудзілі на два гады «хатняй хіміі» па так званай «карагоднай справе» у Берасці. Пасля — яшчэ на адзін год абмежавання волі без накіравання ў карную ўстанову за «абразу Лукашэнкі».
У 2022 годзе Гнаўк затрымалі, арыштавалі на 15 сутак за «парушэнне рэжыму адбыцця пакарання» і завялі крымінальную справу паводле двух артыкулаў: 367 (паклёп на Лукашэнку) і 369-1 (дыскрэдытацыя Рэспублікі Беларусь). Паводле гэтай справы жанчыне прысудзілі 3,5 гады калоніі агульнага рэжыму.
Ужо ў калоніі на палітзняволеную завялі новую крымінальную справу — гэтым разам за «непадпарадкаванне патрабаванням адміністрацыі карнай установы». У выніку ёй прысудзілі яшчэ год зняволення і этапавалі з гомельскай калоніі ў Зарэчча.
Cваякі Алены Гнаўк не атрымліваюць ад яе лістоў
Дачка палітзняволенай Алены Гнаўк выехала з Беларусі з трыма дзецьмі
Больш за пяць месяцаў няма сувязі з 67-гадовай палітзняволенай Аленай Гнаўк
«Сама юрыстка, і дзеліцца ведамі з новымі сяброўкамі». Алена Гнаўк у калоніі стараецца не сумаваць