U Rasii mabilizavany piać razoŭ źbiahaŭ z vajskovaj častki — chavaŭsia ŭ dziaŭčyny, u mamy i ŭ vioscy ŭ hurkach
Mužčynu štoraz znachodzili i viartali, ale jon nie zdavaŭsia.
08.10.2024 / 14:22
Ilustracyjnaje fota AP
U Rasii mabilizavany piać razoŭ źbiahaŭ z vajskovaj častki. U vyniku jamu dali realny termin.
30-hadovy maskvič Aleh (imia źmieniena) da abviaščeńnia tak zvanaj častkovaj mabilizacyi vosieńniu 2022 hoda pracavaŭ zvarščykam. Da hetaha jon adsłužyŭ terminovuju słužbu ŭ čaściach SPA i niadoŭha słužyŭ pa kantrakcie. Atrymaŭšy pozvu pa mabilizacyi, Aleh pajšoŭ u vajenkamat biez rozdumaŭ, paviedamlaje Baza.
Z vajskovaj častki jaho spačatku zabrali na vučeńni ŭ Pieciarburh, potym viarnuli nienadoŭha ŭ častku i adpravili ešałonam u pryfrantavuju Biełharadskuju vobłaść.
U vajenkamacie Aleha zapeŭnivali, što mabilizavanych adpuściać dadomu paśla troch miesiacaŭ vučeńniaŭ. Hetaha, adnak, nie adbyłosia, i Aleh vyrašyŭ źbiehčy. Jon pakinuŭ častku, uziaŭ taksi i pajechaŭ dadomu. Chavaŭsia chłopiec na zdymnaj kvatery ź dziaŭčynaj, ale nieŭzabavie za im pryjšli vajskoŭcy i zabrali jaho nazad u častku. Jak raspaviadajuć baćki, Aleha zdała jaho dziaŭčyna.
U kastryčniku mabilizavany znoŭ zmoh źbiehčy z častki i schavaŭsia doma, dzie jaho paźniej znajšła vajskovaja palicyja. U kancy studzienia Aleh arhanizavaŭ novy ŭcioki. U hety raz jon viarnuŭsia ŭ častku sam paśla damovaŭ maci. U častcy chłopiec prabyŭ usiaho miesiac, jaho dniavalnaha da batarei i znoŭ uciok.
Złavili Aleha praź niekalki miesiacaŭ u adnoj ź viosak, kali chłopiec sadžaŭ ahurki. Da jaho padyšli supracoŭniki vajskovaj palicyi, spytali: «Vy Aleh Paŭłaŭ?» (proźvišča i imia źmienienyja). Toj adkazaŭ: «Nijak nie», — pakazaŭ na susiedni dom i ŭciok. Palicyjanty źvieryli jaho asobu z fota, pierakanalisia, što heta ŭsio ž jon, i schavalisia ŭ kustach kala doma. Da nočy Aleh viarnuŭsia — tam jaho i zatrymali.
U žniŭni chłopcu znoŭ udałosia źbiehčy z vajskovaj častki ŭ Maskvie: jon paprasiŭsia vyjści ŭ prybiralniu i, skarystaŭšysia tym, što karavulny nie prasačyŭ za im, uciok praz akno. Kali stali šukać, znajšli tolki śled ad jaho abutku na padvakońniku.
U hety raz Aleh znajšoŭsia chutka pa źbiehu abstavinaŭ. Jon pajechaŭ na taksi, ale volaj vypadku mienavita hety aŭtamabil vyrašyli pravieryć inśpiektary DAI na vyjeździe z Maskvy. U mabilizavanaha z saboj nie było dakumientaŭ, ale pa proźviščy, imia jaho znajšli ŭ bazie vyšuku, a zatym viarnuli ŭ častku.
17 vieraśnia vajskovy sud prysudziŭ mužčynu da 7,5 hoda pazbaŭleńnia voli ŭ kałonii ahulnaha režymu. Aleh płanuje asprečvać pastanovu, a pakul utrymlivajecca ŭ adnym ź SIZA Maskvy.