Navukoŭcy stvaryli tkaninu, jakaja adaptujecca da nadvorja i tempieratury čałavieka
Novaja raspracoŭka na asnovie skury kalmara moža źmianić suśvietnuju tekstylnuju industryju.
08.10.2024 / 15:09
Ilustracyjnaja vyjava vopratki, stvoranaj z materyjału sa skury kalmara, zhienieravanaja ChatGPT (DALL·E)
Daśledčyki z Kalifarnijskaha ŭniviersiteta ŭ Irvajnie, ZŠA, raspracavali tkaninu, zdolnuju adaptavacca da tempieratury čałavieka i navakolnaha asiarodździa. Materyjał, natchniony skuraj kalmara, moža taksama i rehulavać ciapło čałaviečaha arhanizmu, piša navukovy časopis APL Bioengineering.
Skura kalmara źmianiaje koler i tekstruru dziakujučy chromataforam, śpiecyjalnym kletkam, jakija kantralujuć adlustravańnie śviatła. Novy materyjał pracuje ź infračyrvonym vypramieńvańniem, jakoje čałaviek vyłučaje ŭ vyhladzie ciapła. Heta dazvalaje stvarać adaptyŭnuju vopratku, zdolnuju rehulavać tempieraturu cieła.
«Struktura novaha materyjału składajecca z palimiera ź miednymi «vyspačkami», jakija źmianiajuć adlustravańnie ciapła pry raściahnieńni tkaniny. Heta dazvalaje kantralavać ciepłaabmien u zaležnaści ad patrebaŭ karystalnika, što adkryvaje mahčymaści dla vyrableńnia spartyŭnaha i zimovaha adzieńnia.
Hałoŭnaja asablivaść u tym, što tkanina moža dychać i prydatnaja dla myćcia. Kab tkanina dychała, materyjał byŭ pierfaravany, što dazvoliła stvaryć šerah adtulin, jakija, padobna bavoŭnie, zabiaśpiečvajuć pranikalnaść dla pavietra i vadzianoha paru», — adznačajuć daśledčyki z Kalifarnijskaha ŭniviersiteta.
Materyjał prajšoŭ vyprabavańni z vykarystańniem infračyrvonaj śpiektraskapii i śpiecyjalnych haračych plit. Jon dakazaŭ svaju zdolnaść kiravać ciapłom navat paśla pierfaracyi i intehracyi ŭ tkaninu. Daśledčyki dabavili na pavierchniu tkaniny plonku, jakaja abaraniaje materyjał ad dehradacyi padčas myćcia.
Novy kampazitny materyjał moža stać asnovaj dla raspracoŭki kurtak, šapak i inšych vidaŭ adzieńnia, jakija možna budzie nasić u lubuju paru hoda, śćviardžajuć navukoŭcy.
Dyzajniery raspracavali adzieńnie z žełacinu
Vučonyja abiacajuć, što nieŭzabavie ponačy budzie bačyć kožny čałaviek