U žodzinskaj paliklinicy abviarhajuć, što ŭ ich u rehistratury pamior mužčyna
Pavodle aficyjnaj infarmacyi, 3 kastryčnika ŭ Žodzinie było zafiksavana dźvie śmierci. Nivodnaja ź ich nie adbyłasia ŭ paliklinicy, paviedamiła vydańnie «Minskaja praŭda».
07.10.2024 / 23:08
«Paliklinika adkryvajecca ŭ 7:00, zdača analizaŭ pačynajecca ŭ 7:30, a pryjom śpiecyjalistaŭ — u 8: 00. Pastajanna kala rehistratury znachodzicca administratar», — zajaviła hałoŭnaja doktarka Žodzinskaj palikliniki Taćciana Nikifarava.
Raniej vidavočcy paviedamili vydańniu Ex-press.by, što 3 kastryčnika ŭ žodzinskaj paliklinicy ŭ čarzie pa tałony pamior mužčyna, jakomu na vyhlad było za 70.
«Mužčyna pryjechaŭ u palikliniku na rovary, prykładna ŭ 6:30, siadzieŭ u čakańni, pakul adkryjecca rehistratura. Miortvym jaho vyjaviŭ inšy čałaviek, jaki taksama stajaŭ u čarzie. Kab atrymać tałon da niekatorych lekaraŭ, ludzi pryjazdžajuć vielmi rana», — raskazaŭ śviedka.
Ex-press.by adznačaje, što ŭ Biełarusi niedziaržaŭnyja ŚMI pastajanna sutykajucca ź ciažkaściami ŭ atrymańni dakładnaj infarmacyi pa adčuvalnych pytańniach. Dostup da aficyjnych danych abmiežavany, a pravierka takich vypadkaŭ praktyčna niemahčymaja. Pry hetym ułady niaredka chavajuć infarmacyju pra padziei, jakija mohuć vyklikać hramadskaje abureńnie.
Pry hetym čerhi pa tałony da lekara z samaha ranku zajmajuć i ŭ Žodzinie, i ŭ Barysavie. Tak, u lipieni barysaviec pryjšoŭ da budynka miascovaj palikliniki a čaćviortaj hadzinie ranicy, kab być pieršym u čarzie pa tałon. Jon uziaŭ z saboj kresła.
U Žodzinie mužčyna pamior u paliklinicy ŭ čarzie pa tałony
Ci možna ŭ Biełarusi zabicca, zvaliŭšysia ŭ padziemny pierachod?
U Bujničach na Mahiloŭščynie raptoŭna pamior 17-hadovy navučeniec kaledža