7 młn litraŭ piva i 98 tysiač sprobaŭ skraści kufal — Aktobierfiest padvioŭ vyniki
Pavodle papiarednich acenak arhanizataraŭ, sioleta na Aktoberfest u Miunchien pryjechali blizu 6,7 młn haściej, piša Bild.
07.10.2024 / 09:28
Telehram-kanał Bild
U 2023 hodzie było 7,2 młn naviedvalnikaŭ — ale tady śviatkavańnie doŭžyłasia na dva dni daŭžej. Sioleta vypita bolš piva, choć cana litrovaha kufla ŭ niekatorych miescach dasiahała 15 jeŭra. Usiaho było pradadziena 7 młn litraŭ piva, u minułym hodzie heta było 6,5 młn. Hastranomy taksama adznačyli rost prodažaŭ ježy na 9%.
Samaje zapatrabavanaje strava śviata — smažanaja kuryca.
Arhanizatary adznačajuć, što kolkaść złačynstvaŭ sioleta źniziłasia. «Heta było mirnaje i biaśpiečnaje śviata», — padviała vyniki palicyja. Pres-sakratar palicyi Andreas Frankien adznačyŭ, što zakliki orhanaŭ biaśpieki spracavali, hości byli ŭvažlivyja adno da adnaho.
Kolkaść złačynstvaŭ źniziłasia prykładna na 25%, u tym liku dziakujučy prysutnaści palicyi i videanazirańniu.
Sanitarnaja słužba fiestyvalu taksama paviedamiła, što sioleta daviałosia pakłapacicca pra mienšuju kolkaść pacyjentaŭ.
Taksama pamienšała kolkaść sprobaŭ upotaj vynieści kufal na pamiać. Sioleta ŭ haściej na vychadzie sa śviata zabrali ŭsiaho 98 tysiač piŭnych kuflaŭ. U 2023 hodzie achoŭniki kanfiskavali bolš za 115 tysiač kubkaŭ.
Sioleta było znojdziena 3,5 tysiačy zabytych rečaŭ — siarod ich 16 skuranych štanoŭ i niekalki par žanočych tuflaŭ. Arhanizatary miarkujuć, što ich uładalnicy mahli pierajści na šłapaki, jakija pradajucca na suvienirnych stendach. Što nadzieli mužčyny zamiest štanoŭ, nieviadoma.
Šmatlikija hości pryjechali z-za miažy, u asnoŭnym z ZŠA i Italii, a taksama ź Vialikabrytanii, Aŭstryi, Polščy, Francyi, Šviejcaryi, Ispanii, Niderłandaŭ i, upieršyniu ŭ bolšaj kolkaści, ź Indyi.
Bolšaść naviedvalnikaŭ byli apranutyja ŭ tradycyjnyja stroi — skuranyja štany ci dyrndli (tradycyjnaja bavarskaja sukienka).
Apošni kubak piva ŭ ramkach śviata pradali hetaj nočču — i Aktobierfiest-2024 byŭ zakryty.