Školnikaŭ u Mazyry navučajuć na apierataraŭ bieśpiłotnikaŭ dla armii
Apierataraŭ dronaŭ pačali navučać u Biełarusi na bazie DTSAAF. Novy napramak nazvany «siekcyjami pa dron-rejsinhu», piša «Fłahštok».
03.10.2024 / 11:20
Mazyr staŭ pieršym u Homielskaj vobłaści, dzie adkryli takuju siekcyju. Navučencaŭ starejšych kłasaŭ paznajomiać z kanstrukcyjaj drona i navučać im kiravać, płanujecca, što najlepšyja vučni voźmuć udzieł u spabornictvach pa dron-rejsinhu.
Novy napramak padadzieny jak raźvićcio modnaha sportu, ale paviedamlajecca, što «akramia spartyŭnaha składnika, raźvićcio dron-rejsinhu dazvolić padrychtavać budučych apierataraŭ bieśpiłotnych latalnych aparataŭ jak dla Uzbrojenych sił, tak i dla inšych śfier žyćciadziejnaści».
Pry hetym niepaŭnaletnich udzielnikaŭ siekcyi ŭ Mazyry apranuli ŭ kamuflažnuju formu. Adzin z vychavancaŭ na adnym fota prysutničaje z patčam na pravaj ruce, na nastupnym fota školnik užo bieź jaho. Imavierna, školnika paprasili źniać pravakacyjnuju rasijskuju vajskovuju simvoliku.
Metu takich siekcyj ahučyŭ u vieraśni staršynia Centralnaha savieta DTSAAF Biełarusi hienierał-major Andrej Niekraševič. Pavodle jaho słoŭ, «mnohija zadačy ŭ płanie padrychtoŭki moładzi da słužby ŭ vojsku ŭ DTSAAF pieratvarajuć praź dziciača-junacki sport», i ŭžo da momantu pryzyvu chłopcy majuć praktyčny vopyt:
«Pavodle našych raźlikaŭ, da 2026 hoda my zmožam całkam zabiaśpiečyć siłavyja struktury apieratarami dronaŭ».
A ŭ pačatku hoda hety ž hienierał paviedamlaŭ pra toje, što ŭ Biełarusi źjavicca 10 siekcyj pa navučańni dron-rejsinhu na bazie DTSAAF, kab padrychtavać budučych apierataraŭ BPŁA «dla Uzbrojenych Sił i inšych arhanizacyj». U nastupnym hodzie ŭ kožnaj vobłaści źjavicca jašče pa dva adździaleńni dron-rejsinhu.
«Takim čynam, my zmožam bazava rychtavać kala tysiačy apierataraŭ štohod. Heta adkazvaje našaj hałoŭnaj zadačy-sadziejničańniu armii», — zajaŭlaŭ hienierał.
U Mazyry na adkryćcio siekcyi pryjšła cełaja delehacyja čynoŭnikaŭ razam z pravasłaŭnym śviatarom.