Unikalny vypadak: vyzvalenaha pa amnistyi viarnuli ŭ kałoniju. Hetaha damahlisia baćki achviary
Kiroŭca, jaki źbiŭ na piešachodnym pierachodzie dzicia ŭ Mahilovie i praz paŭhoda vyjšaŭ pa amnistyi, znoŭ znachodzicca ŭ kałonii. Pra heta paviedamili ŭ sacsietkach baćki chłopčyka.
03.10.2024 / 09:33
Avaryja ŭ Mahilovie. Fota: mahiloŭskaja milicyja
U studzieni 2024 hoda 61-hadovy žychar Mahilova Vital Kilesa naśmierć źbiŭ 10-hadovaha chłopčyka. Toj pierachodziŭ darohu pa piešachodnym pierachodzie, śviatłafor nie pracavaŭ. Aŭtamabili pavinny byli prapuścić chłopčyka, ale narmalnaha aśviatleńnia nie było, kiroŭcy nie zaŭvažali jaho. Adna mašyna prajechała prosta pierad im, a druhaja źbiła naśmierć školnika.
Jak vyśvietliłasia, kiroŭca — toj samy Kilesa — pieravyšaŭ chutkaść. Jon pryznaŭ vinu, tłumačyŭ, što nie zaŭvažyŭ chłopčyka. Pakolki Kilesa byŭ ćviarozy, u krasaviku 2024 hoda jamu prysudzili piać hadoŭ kałonii-pasialeńnia (kali b byŭ pjany, była b zvyčajnaja kałonija).
U žniŭni 2024 hoda baćki zahinułaha chłopčyka daviedalisia, što Kilesa vyjšaŭ na svabodu pa amnistyi, choć pravioŭ za kratami paŭhoda. Jany byli aburanyja, što Kilesu adpuścili tak rana. Baćki chłopčyka napisali videazvarot, jaki šyroka razyšoŭsia pa tyktoku i sabraŭ bolš za 330 tysiač łajkaŭ. Taksama baćki schadzili na asabisty pryjom da hienieralnaha prakurora Andreja Švieda.
Pryčynaj vyzvaleńnia kiroŭcy stali jaho prablemy sa zdaroŭjem — toje, što raniej jon prachodziŭ lačeńnie ŭ suviazi z ankałohijaj.
Ciapier kamisija ź miedykaŭ pierahladzieła jahony dyjahnaz. I było vyrašana viarnuć jaho ŭ kałoniju-pasialeńnie — sa svaim dyjahnazam jon moža adbyvać pakarańnie.