Paralizavanamu žurnalistu pryjšłosia paŭźci ŭ prybiralniu ŭ samalocie
Žurnalist Bi-bi-si Frenk Hardnier skazaŭ, što pieražyŭ źnievažalny dośvied. Svajoj historyjaj jon padzialiŭsia ź Bi-bi-si.
03.10.2024 / 07:46
Žurnalist sfatahrafavaŭ svaje nohi ŭ prachodzie
«Kali ŭ paniadziełak ja lacieŭ z Varšavy nazad u Łondan, mnie daviałosia paŭźci pa padłozie samalota, kab dabracca da prybiralni. Ja paralizavany z momantu, kali 20 hadoŭ tamu ŭ mianie strelili bajeviki Al-Kaidy ŭ Saudaŭskaj Aravii. Moj dośvied padčas hetaha palotu byŭ nadzvyčaj niazručnym fizična i źnievažalnym.
Ja razumieju, što dyskamfort, ź jakim sutykajusia ja i inšyja pasažyry z abmiežavanymi mahčymaściami, mienšy ŭ paraŭnańni z žachami, jakija adčuvajuć ludzi ŭ zonach kanfliktaŭ pa ŭsim śviecie.
Ja vydatna viedaju heta, bo aśviatlaju ich historyi, i tamu moj vypadak adnosna niaznačny.
Ale heta było vielmi źnievažalna — paŭźci ŭ kaściumie pa padłozie samalota pierad inšymi pasažyrami.
Polskaja avijakampanija LOT, jakaja vykonvaje rejsy ŭ Chitrou i nazad, zajaviła, što jaje palityka nie zaklučajecca ŭ tym, kab trymać vazok u prachodzie samalota.
Heta nieprymalna dla pasažyraŭ z abmiežavanymi mahčymaściami, bo hetyja pryłady mienšyja za dziciačuju kalasku, ich možna lohka skłaści i pakłaści ŭ šafu abo palicu nad hałavoj.
British Airways, Easyjet i ŭsie inšyja avijakampanii, jakimi ja niadaŭna lotaŭ, majuć vazki na borcie.
Na moj pohlad, heta nieskładana vypravić. Hetaja «palityka», niesumnienna, pamyłkovaja — jaje treba nieadkładna źmianić.
Ciapier 2024 hod, a nie 1970-y, i mianie šakuje toje, što ŭ brytanskija aeraporty dapuskajuć avijakampanii, jakija faktyčna zajaŭlajuć: «kali vy nie možacie chadzić, vy nie zmožacie skarystacca tualetam u našych samalotach».
Polskija avijalinii LOT zajavili Bi-bi-si, što «vybačajucca za sumny dośvied» i «za niazručnaści i dyskamfort, vyklikanyja adsutnaściu invalidnaha vazka na borcie».
U zajavie havorycca, što z-za «abmiežavanaj prastory» na blizkamahistralnych rejsach niama invalidnych vazkoŭ na borcie, ale avijakampanija razumieje «važnaść dastupnaści» i «aktyŭna testuje sposaby biaśpieki invalidnych kalasak na borcie padčas blizkamahistralnych rejsaŭ».
«Na žal, mianie heta nie pierakonvaje, bo ŭ mai ja lacieŭ hetaj avijakampanijaj z Talina ŭ Łondan, i tam adbyłosia toje ž samaje», — kaža žurnalist.
Pa jaho słovach, piersanał na ziamli byŭ davoli bieskampramisnym i adchilaŭ ideju, što samalot pavinien mieć takoje abstalavańnie.
«Naadvarot, padčas palotu ŭ paniadziełak bartavy piersanał pavodziŭ siabie fantastyčna.
Jany byli źbiantežanyja, vybačalisia i dapamahali, jak mahli. Jany zaachvočvali mianie skardzicca na situacyju, tamu što bačyli, jak heta niapravilna.
Ja adčuŭ niešta padobnaje 12 hadoŭ tamu na kienijskich avijalinijach. Paśla majoj zajavy avijakampanija vyrašyła prablemu, i ja atrymaŭ niekalki vydatnych listoŭ ad turystyčnych firmaŭ, u jakich dziakavali za toje, što ciapier ich klijenty z abmiežavanymi mahčymaściami adčuvajuć siabie kamfortna na rejsach hetaj avijakampanii.
Ja ździŭleny tym, što hetaje pytańnie pryjšłosia padymać znoŭ. Vialikabrytanija nadaje šmat uvahi abaronie pravoŭ ludziej ź invalidnaściu. Televiadučaja i aktyvistka Safi Morhan viadzie fantastyčnuju pracu pa pavyšeńni daśviedčanaści ŭ hetaj halinie, jana navat sustrakałasia z prezidentam Bajdenam, kab abmierkavać heta.
Ale haniebna, što pasažyry z abmiežavanymi mahčymaściami, jakija vylatajuć z brytanskich aeraportaŭ, pa-raniejšamu padviarhajucca takoj dyskryminacyi», — napisaŭ Hardnier.