Drama byłoha ministra «ŁNR», jakoha znajšli niežyvym — śmierć kaleh, vykrytaje žyćcio na dźvie siamji, zapoj
U Padmaskoŭi znajšli cieła byłoha ministra enierhietyki «ŁNR». Pobač z 50-hadovym Kanstancinam Zavizienavym znajšli ahniastrelnuju zbroju — śledčyja adrazu vyznačyli, što jon skončyŭ žyćcio samahubstvam.
02.10.2024 / 11:25
Kanstancin Zavizienaŭ, fota Mash
Rasijskija ŚMI ŭ padrabiaznaściach pierakazvajuć žyćciovuju dramu čynoŭnika, jakaja pryviała da taho vyniku.
Hod tamu jon zvolniŭsia ź ministerskaj pasady ŭ «ŁNR». Raskazvaŭ blizkim, što stamiŭsia chavać kaleh — kala dziesiaci čałaviek, ź jakimi jon pracavaŭ, zahinuli za čas sumiesnaj pracy.
Kali viarnuŭsia dadomu, pačalisia prablemy ŭ siamji — a ŭ Zavizienava z žonkaj było čaćviora synoŭ. Žonka vypadkova znajšła ŭ jaho razbłakavanym telefonie pierapisku z kachankaj. Vyśvietliłasia, što ŭ čynoŭnika cełych 18 hadoŭ była inšaja žančyna, da jakoj jon uvieś hety čas jeździŭ u «kamandziroŭki» ŭ Nižni Noŭharad. Jość i pazašlubnaja dačka, pryčym jana vučycca ŭ adnym univiersitecie sa starejšym synam Zavizienavych.
Žonka paviedamiła ab razvodzie i vyviezła ŭsie rečy čynoŭnika ŭ inšuju kvateru.
Dalej — bolš. Z pracy, kudy Zavizienava ŭziali paśla «ŁNR», jaho taksama zvolnili.
Apošnija niekalki tydniaŭ žyćcia eks-čynoŭnik pravioŭ u zapoi. «Kali vypivaŭ, pytaŭsia ŭ blizkich: «Za što vy tak sa mnoj?» — cytuje jaho słovy kanał VČK-OHPU.
Urešcie Zavizienaŭ adpraviŭ paviedamleńni rodnym i blizkim z raźvitalnymi słovami.
Pa słovach syna eks-čynoŭnika, u apošni viečar baćka piŭ harełku i hutaryŭ ź im ab žyćci. Potym jon płanavaŭ pajechać spać u hatel, a ranicaj uziać ružžo i rušyć na palavańnie na Kamčatku. Z hetaha ružža Zavizienaŭ i zastreliŭsia.