Susied Alesia Bialackaha raskazaŭ, u jakich umovach trymajuć nobieleŭskaha łaŭreata
Desantnik Rusłan Akostka bolš za hod pravioŭ u kałonii strohaha režymu ŭ Horkach, dzie ŭtrymlivajuć Alesia Bialackaha.
01.10.2024 / 12:45
Nobieleŭski łaŭreat, zasnavalnik «Viasny» Aleś Bialacki adbyvaje pakarańnie ŭ kałonii ŭ Horkach. Jamu prysudzili 10 hadoŭ źniavoleńnia za «kantrabandu hrošaj» i «finansavańnie dziejańniaŭ, jakija parušajuć hramadski paradak».
«Upieršyniu my sutyknulisia z Alesiem u stałovaj. A tak choć my i ŭ roznych atradach byli, ale bačyŭ jaho davoli časta. Nie mahu skazać, što my šmat razmaŭlali. Administracyja kałonii niehatyŭna stavicca da kamunikacyi z palitviaźniami. Kali zaŭvažać, mohuć być nastupstvy — u toj ža izalatar pasadziać. I Aleś heta cudoŭna razumieje. Jon mała razmaŭlaje. A ja taki čałaviek, što nie budu naviazvacca i dastaŭlać dyskamfort. Tak, my časam pierakidvalisia paraj słoŭ, ale pahłyblena nie abmiarkoŭvali temy», — raskazvaje Rusłan Akostka, jaki vyzvaliŭsia ŭ lipieni 2024 hoda i źjechaŭ ź Biełarusi.
Čytajcie taksama. «Ja padniaŭ adnaho sa słabavikoŭ — i vypuściŭ jaho na asfalt». Desantnik Rusłan Akostka raskazaŭ, jak adsiedzieŭ 4 hady
Aleś Bialacki ŭ 2020 hodzie
Raniej jon mała viedaŭ pra Alesia Bialackaha, a daŭnija fotazdymki pravaabaroncy pabačyŭ tolki paśla taho, jak sam vyzvaliŭsia.
— Mahu skazać, što Aleś dakładna schudnieŭ. Ale ŭ hetym niama ničoha niezvyčajnaha. Ja viedaju vypadki, kali ludzi skidali pa 30 kiłahram, sam ja schudnieŭ na 14 kiłahramaŭ.
Akostka tłumačyć, što heta źviazana ź ciažkaj fizičnaj nahruzkaj u kałonii i drennym charčavańniem. Typovaje mieniu: ad ranicy aŭsianka, na abied piarłoŭka, uviečary bulba. Časam byvajuć rybnyja katlety. Miasa, kali jość, dyk papadaje daloka nie kožnamu ŭ talerku — jak pašancuje. Sadaviny nie dajuć nikoli, harodninu — redka. Vosieńniu-zimoj čaściej hatujuć sałatu ź biełakačannaj kapusty.
— Dobra, što ŭ mianie była mahčymaść chadzić u kramu i nabyvać niešta ź ježy. Mnie jak palityčnamu dazvalali kuplać štomiesiac na 80 rubloŭ. I voś pry takich umovach ja skinuŭ 14 kiłahram. Nie viedaju, što było b, kali b nie moh dakuplać niešta.
Rusłan paćviardžaje, što na palitviaźniaŭ cisnuć i tym, što skaračajuć sumy, jakija dazvolena patracić u kramie kałonii.
«Kali ŭ źniavolenaha ŭsio nibyta narmalna z pavodzinami, to jamu dazvalajuć zakuplacca na 4 bazavyja. Takim «złosnym parušalnikam» jak ja — usiaho na 2 bazavyja. A ŭ kałonii mahčymaść nabyć dadatkovuju ježu vielmi ŭpłyvaje na fizičny stan».
Aleś Bialacki ŭ sudzie
Akostka raskazvaje, što Aleś Bialacki pracuje na drevaapracoŭcy.
«Na jaho taksama składajucca akty za parušeńni — za pył za tumbačkaj, za ručnik na nary ci za adzieńnie na spalnym miescy. U hetym płanie ŭsio banalna i adnatypna.
Alesia časta kidajuć u štrafny izalatar, traplaŭ jon u PKT. Doŭhi čas Bialackamu nie davali źviazacca z rodnymi — pamiataju, što list jon narešcie atrymaŭ pierad samym maim vyzvaleńniem. Telefanavać blizkim jamu taksama nie dazvalali».
Rusłan kaža, što adčuvaje sabie Aleś bolš-mienš narmalna, ale zachavać zdaroŭje va ŭmovach kałonii davoli składana.
{DONATE_PAYPAL}
Bialackaha ŭ Horackaj kałonii viarnuli z PKT u atrad i pazbavili pieradačaŭ