Wargaming ukłaŭsia ŭ kuplu 100 kvater u Litvie. I, imavierna, zarablaje na ich prodažy i arendzie
Wargaming zarablaje ŭ Litvie nie tolki na hulniach, ale i na ździełkach ź nieruchomaściu. Pavodle litoŭskich miedyja i ekśpiertaŭ rynku, za try hady kampanija ŭkłałasia ŭ kuplu nie mienš za 100 kvater u Vilni.
01.10.2024 / 11:25
Žyllo nabyvałasia dla supracoŭnikaŭ, ale paśla častka kvater akazałasia na adkrytym rynku dla pakupki i arendy, piša Devby.io.
Što viadoma
Pavodle infarmacyi vydańnia Verslo žinios, Wargaming Group Limited vałodaje zarehistravanaj u Litvie kampanijaj Equinox Estate. Jana zajmajecca ździełkami ŭ śfiery nieruchomaści.
Litoŭskija miedyja paviedamlajuć, što Equinox Estate u 2021 hodzie vykupiła 76 kvater u žyłym kompleksie Tower na praśpiekcie Kanstytucyi ŭ Vilni. Siaredniaja płošča kvatery pieravyšała 90 kv. mietraŭ, a košt adnoj kvatery składaŭ kala 300 tysiač jeŭra. Pavodle acenak ekśpiertaŭ, ahulnaja suma ŭhody mahła skłaści kala 20 młn jeŭra.
Paźniej Equinox Estate pradała častku kvater u Tower. Chto byŭ pakupnikom — supracoŭniki Wargaming abo žychary Vilni, jakija nie majuć dačynieńnia da kampanii — nie ŭdakładniajecca. Taksama nie havorycca, pa jakoj canie byli pradadzienyja kvatery i ci zmahła kampanija zarabić na hetym.
Equinox Estate kiruje 56 kvaterami ŭ ŽK Tower, jakija zdajucca ŭ arendu. Usiaho pad kiravańniem kampanii znachodzicca 100 kvater, a taksama inšyja abjekty, u tym liku padziemnyja parkovačnyja miescy.
Navošta Wargaming inviestuje ŭ niaprofilny biznes
Rezki rost kolkaści zamiežnikaŭ, u tym liku biełarusaŭ, pryvioŭ da rostu popytu na nieruchomaść i rostu koštaŭ na arendu ŭ Litvie. Tamu va ŭmovach deficytu prapanovy Wargaming vyrašyŭ dapamahčy svaim supracoŭnikam-rełakantam i ŭkłaŭsia ŭ kuplu nieruchomaści — adznačajuć ekśpierty rynku nieruchomaści, ź jakimi pahutaryŭ devby.
Paśla častka nabytych kvater apynulisia na adkrytym rynku ŭ jakaści abjektaŭ dla prodažu abo arendy. Ekśpierty miarkujuć, što heta było častkaj inviestycyjnaj stratehii Wargaming.
Kiraŭnik adździeła daśledavańniaŭ kampanii Ober-Haus Rajmondas Rehinis u kamientary Verslo žinios padkreśliŭ, što heta dobry sposab atrymlivać stabilny dachod. Pavodle jaho słoŭ, analiz partfiela kaža pra toje, što Wargaming nie tolki imkniecca zabiaśpiečyć žyllom svaich supracoŭnikaŭ, ale taksama bačyć inviestycyjnyja mahčymaści na rynku nieruchomaści.
Na dumku ekśpierta, Wargaming praz Equinox Estate vykarystoŭvaje hibrydny farmat inviestavańnia ŭ nieruchomaść. Jon dazvalaje hnutka reahavać jak na patreby supracoŭnikaŭ, tak i na situacyju na rynku.
Anałahičnym čynam, ale ŭ mienšaj stupieni, na rynku dziejničajuć i kampanii ź inšych halin-nabyvajučy žyłyja damy abo kamiercyjnyja pamiaškańnia i prystasoŭvajučy ich da patrebaŭ svaich supracoŭnikaŭ. Kali ŭnutranaha popytu niama, nieruchomaść možna zdać u arendu abo pradać na rynku.
Ci budzie Wargaming i dalej układvacca ŭ žyłuju nieruchomaść?
Na dumku ekśpierta ŭ śfiery nieruchomaści, heta budzie zaležać ad stratehii raźvićcia litoŭskaha ofisa kampanii.
— Kolkaść śpiecyjalistaŭ u Wargaming i niekatorych inšych biełaruskich IT-kampanijach skaračajecca. Situacyja z doŭhaterminovaj prysutnaściu biełarusaŭ u Litvie pahoršyłasia praz šerah pryčyn: spynieńnie dziejańnia DNŽ i ciažkaści ź ich atrymańniem, uviadzieńnie zabarony dla aŭtamabilaŭ ź biełaruskimi numarami i h. d.
Niekatoryja biełarusy ŭžo mianiajuć Litvu na Polšču ci Hiermaniju. I popyt na vałodańnie žyllom źnižajecca.
Pry najaŭnaści značnaj kolkaści kaštoŭnych śpiecyjalistaŭ, jakija zachočuć pastajanna žyć i pracavać u Litvie, u Wargaming buduć padstavy zachavać nieabchodny partfiel aktyvaŭ.
Kali kolkaść supracoŭnikaŭ praciahnie skaračacca, to najaŭnaść takoha partfiela dla Wargaming jak častka apieracyjnaj stratehii moža apynucca zanadta darahim i niemetazhodnym.
Litoŭskaja kamanda Wargaming skaračajecca z pačatku hoda. Kali na pačatak studzienia ŭ kampanii było zarehistravana 914 śpiecyjalistaŭ, to na siońnia — 865 (minus 5,5%).
Akramia pytańniaŭ, źviazanych lehalizacyjaj, jašče adna z mahčymych pryčyn skaračeńnia štatu — aptymizacyja vydatkaŭ na piersanał.
Tym nie mienš Wargaming praciahvaje najmać novych supracoŭnikaŭ u litoŭski ofis. Na sajcie kampanii na dadzieny momant raźmieščana 16 vakansij dla pracy ŭ Litvie. Kampanii patrebnyja raspracoŭščyki, dyzajniery, inžyniery.
U červieni Wargaming stała lidaram pa ŭzroŭni siarednich zarobkaŭ siarod litoŭskich IT-kampanij ź biełaruskimi karaniami. Płata bruta pierasiahnuła 12 tysiač jeŭra — heta ŭ 2-2,5 razy vyšej, čym u inšych, imavierna, takaja vysokaja płata źviazana z vypłataj hadavych bonusaŭ. Adznačym, što ŭ Wargaming vialikaja raźbiežka pa zarobku ŭ zaležnaści ad uzroŭniu śpiecyjalista. Samy maleńki zarobak «brudnym» — 3 tysiačy jeŭra, samy vialiki — 10 tysiač jeŭra naprykład, na vysoki zarobak moža raźličvać Senior Infrastructure Engineer (Kubernetes).
Minekanomiki: Ajcišniki viartajucca ŭ Biełaruś