Žurnalisty atrymali dakumienty, datyčnyja śmierci Navalnaha. Jany ŭkazvajuć na toje, što jaho mahli atrucić
U materyjałach śledčych źnikli zhadki pra boli ŭ žyvacie i rvotu.
29.09.2024 / 17:06
Fota: Markus Schreiber, AP
Vydańnie The Insider paviedamiła pra atrymańnie dostupu da sotniaŭ dakumientaŭ, jakija źviazanyja sa śmierciu rasijskaha apazicyjnaha palityka Alaksieja Navalnaha ŭ kałonii 16 lutaha. Ź ich vynikaje, što pryčynaj śmierci mahło stać atručeńnie.
U adnym z dakumientaŭ śledčy ŭpraŭleńnia SK pa Jamała-Nienieckaj aŭtanomnaj akruzie apisvaje padziei, jakija adbyvalisia pierad śmierciu Navalnaha. Jon śćviardžaje, što palityk adčuŭ bol u žyvacie i loh na padłohu, paśla čaho pačalisia sutarhi i jaho zvanitavała.
U kančatkovaj viersii dakumienta hetaja častka tekstu źnikła. U joj niama nijakich ukazańniaŭ na bol u žyvacie, vanity i sutarhi.
Adnak u vopisu kanfiskavanych abjektaŭ zajaŭlajecca, što na ekśpiertyzu adpraŭlalisia zmyvy rvotnych mas i ich ćviordyja frahmienty.
Aficyjnaj viersijaj śmierci Alaksieja Navalnaha stała parušeńnie sardečnaha rytmu. Ale apytanyja žurnalistami miedyki śćviardžajuć, što apisanyja ŭ dakumientach simptomy składana patłumačyć ničym inšym, jak vynikam atručvańnia. Naprykład, fosfaraarhaničnym rečyvam.