Urahan «Chielen» u ZŠA: zahinuli bolš za 40 čałaviek
Prynamsi 43 čałavieki zahinuli i miljony zastalisia biez elektryčnaści z-za ŭrahanu «Chielen» na paŭdniovym uschodzie ZŠA. Štorm spačatku abrynuŭsia na Fłarydu, zatym zrušyŭsia na poŭnač, u Džordžyju, a taksama ŭ Paŭnočnuju i Paŭdniovuju Karaliny, piša Bi-bi-si.
28.09.2024 / 08:06
Fota: Gerald Herbert / AP
Choć praz sutki «Chielen» istotna asłabła, mietearołahi papiaredžvajuć ab pahrozie mocnych paryvaŭ vietru, liŭnievych daždžoŭ i ŭźniknieńnia tarnada. Damy i darohi ŭ zonie ŭrahanu častkova zatoplenyja.
Adna z paciarpiełych ad pavodki siemjaŭ raspaviała: što jany byli vymušanyja pakinuć svoj dom upłaŭ, kab pierabracca ŭ biaśpiečnaje miesca. Strachavyja kampanii aceńvajuć škodu, naniesienuju «Chielen» u mnohija miljardy dalaraŭ.
Urahanu «Chielen» prysvojena čaćviortaja katehoryja, heta druhi pa sile ŭzrovień urahanu, chutkaść vietru ŭ jakim składaje da 240 km/h.
Pa danych Nacyjanalnaha centra ZŠA pa sačeńni za ŭrahanami, na praciahu sutak «Chielen» pavinna acichnuć, adnak zachavajecca pahroza mocnych viatroŭ, pavodak i apoŭźniaŭ.
«Chielen» zaniała 14-y radok u rejtynhu mahutnaści ŭrahanaŭ u ZŠA za ŭvieś čas nazirańniaŭ. Pry hetym jaje šyrynia aceńvajecca ŭ 675 km, a heta ŭžo treci vynik u historyi — bujniej byli «Ida» ŭ 2017-m i «Apał» u 1996-m hadach.
Prynamsi vosiem čałaviek zahinuli ŭ Fłarydzie ź piatnicy, paviedamlajuć ułady. Hubiernatar Džordžyi Brajan Kemp paviedamiŭ, što ŭ štacie z-za ŭrahanu zahinuli jak minimum 15 čałaviek, uklučajučy adnaho vyratavalnika. Kemp rasparadziŭsia zadziejničać u vyratavalnych rabotach 1 tys. słužačych Nacyjanalnaj hvardyi. Pavodle słoŭ hubiernatara, u štacie pierakryta bolš za 150 daroh, vyjšli sa stroju 1,3 tysiač śviatłaforaŭ, a ŭ niekatorych budynkach zastajucca zabłakavanyja ludzi.
U Paŭdniovaj Karalinie, pavodle źviestak CBS News, zahinuli nie mienš za 17 čałaviek. Z Paŭnočnaj Karaliny paviedamlajuć pra dźvie achviary, pra adnu — ź Virdžynii.
A ŭ štacie Tenesi, u horadzie Ervin, jak pišuć ŚMI, na dach balnicy vybralisia 58 pacyjentaŭ i supracoŭnikaŭ, adkul z-za ŭmoŭ nadvorja ich spačatku nie atrymlivałasia evakujavać ni łodkami, ni viertalotami. Paźniej ludziej usio ž zabrali z dachu budynka viertaloty palicyi i Nachvardyi.
Paviedamlajecca, što praz «Chielen» biez elektryčnaści zastalisia čatyry miljony chatnich haspadarak i kamiercyjnych abanientaŭ.
Žycharka horada Chołms-Bič u Fłarydzie Bryjana Hańje raspaviała, što zaŭvažyła razam ź siamjoj, jak u ich dom pačała zalivacca vada, i pačała pieranosić rečy na stały i łožki, pakul nie pačuła hučny bavoŭna: «My ź siamjoj pierahlanulisia, i vada chłynuła ŭnutr».
Hańje kaža, što ŭziała chatnich žyvioł, zaradnyja pryłady i spłyła z chaty razam z členami siamji, kali vada dachodziła im da plačej.