U Biełym domie paabiacali, što Rasija nie pieramoža Ukrainu
Uładzimir Zialenski sustreŭsia ŭ Biełym domie z prezidentam Džo Bajdenam i vice-prezidentam Kamałaj Charys.
27.09.2024 / 07:12
Fota: Susan Walsh / AP
Džo Bajden paabiacaŭ u čaćvier, što Rasija «nie pieramoža» ŭ vajnie va Ukrainie, padčas vizitu ŭkrainskaha prezidenta Uładzimira Zialenskaha ŭ Bieły dom, piša «Hołas Amieryki».
«Rasija nie pieramoža», — zajaviŭ amierykanski lidar, jaki pryniaŭ Zialenskaha ŭ Avalnym kabiniecie za 39 dzion da prezidenckich vybaraŭ u ZŠA, jakija abiacajuć być nadzvyčaj napružanymi i ad jakich zaležyć budučynia padtrymki Kijeva.
Kab dapamahčy Ukrainie vyjhrać hetuju vajnu, amierykanski prezident abviaściŭ ranicaj u čaćvier ab pavieličeńni vajskovaj dapamohi — pry hetym ničoha nie skazaŭšy ab dazvole na vykarystańnie Kijevam rakiet vialikaj dalokaści, vyrablenych u ZŠA, dla ŭdaraŭ pa Rasii.
Uładzimir Zialenski vitaŭ hetuju abjavu, zajaviŭšy, što jana dapamoža jahonaj krainie dasiahnuć pieramohi ŭ vajnie suprać Rasiei.
Akramia taho, Džo Bajden zaklikaŭ pravieści samit na vysokim uzroŭni ŭ Hiermanii z udziełam 50 krain-sajuźnikaŭ Ukrainy dla kaardynacyi namahańniaŭ.
Džo Bajden, jaki źjaŭlajecca klučavoj fihuraj u zachodniaj padtrymcy Ukrainy z momantu rasijskaha ŭvarvańnia ŭ lutym 2022 hoda, vyrašyŭ vyłučyć Kijevu jašče $8 miljardaŭ dapamohi.
Zatym Uładzimir Zialenski pravioŭ pieramovy ź vice-prezidentam i kandydatam ad Demakratyčnaj partyi Kamałaj Charys, jakaja abiacaje praciahnuć palityku ciapierašniaha prezidenta ŭ dačynieńni da Ukrainy.
«Maja padtrymka ŭkrainskaha naroda niepachisnaja», — zajaviła Kamała Charys u čaćvier padčas sustrečy z prezidentam Ukrainy Uładzimiram Zialenskim.
«U našaj krainie jość ludzi, jakija chočuć prymusić Ukrainu admovicca ad vialikich učastkaŭ jaje suvierennaj terytoryi, patrabujuć, kab Ukraina abviaściła niejtralitet i admoviłasia ad vajennych suviaziaŭ ź inšymi krainami. Heta tyja ž samyja prapanovy, jakija zrabiŭ Pucin, i heta nie prapanovy ab miry. Heta prapanovy ab kapitulacyi, što niebiaśpiečna i biezadkazna», — dadała jana, namiakajučy na svajho supiernika-respublikanca Donalda Trampa.
Ranicaj ukrainskaha prezidenta pryniali ŭ Kanhresie lidary Respublikanskaj i Demakratyčnaj partyj u Sienacie, Mitč Mak-koneł i Čak Šumier.
Ukrainski prezident raskryŭ asnoŭnyja momanty svajho płana pieramohi lidaram Sienata, havorycca ŭ pres-relizie ab sustrečy, apublikavanym jaho ofisam.
Adnak jon nie adkazaŭ na pytańnie žurnalista pra toje, ci źbirajecca jon sustrecca z byłym prezidentam i kandydatam u prezidenty ad Respublikanskaj partyi Donaldam Trampam, jaki byŭ jaho lutym krytykam.
Uładzimir Zialenski prybyŭ u Vašynhton, kab pradstavić svoj płan na nastupny dzień paśla taho, jak Uładzimir Pucin abviaściŭ pra namier źmianić daktrynu Rasii ŭ vykarystańni jadziernaj zbroi.
Heta stanie adkazam na ahresiju suprać Rasii z boku niajadziernaj krainy, ale z udziełam abo padtrymkaj jadziernaj dziaržavy», — zajaviŭ rasijski prezident.