Stała viadoma, u čym padazrajuć biełarusa, zatrymanaha za napad na rasijskaha apazicyjaniera Vołkava
U kryminalnaj spravie ab napadzie na rasiejskaha apazicyjaniera Leanida Vołkava, jakaja rasśledujecca ŭ Polščy, vosiem čałaviek. Adzin ź ich — biełarus. U Nacyjanalnaj prakuratury Polščy raskazali «Biełsatu», u čym jaho padazrajuć.
26.09.2024 / 15:45
Budynak Nacyjanalnaj prakuratury. Varšava (Polšča). Fota: W.krasno / Wikimedia, CC BY-SA 4.0
Pradstaŭnik Nacyjanalnaj prakuratury Polščy paviedamiŭ «Biełsatu», što ŭ spravie napadu na rasiejskaha apazicyjaniera Leanida Vołkava abvinavačvańni vystavili vaśmi ludziam. Adzin ź ich — hramadzianin Biełarusi Viktar P., jakoha padazrajuć u troch złačynstvach, u tym liku pavodle art. 18 i art. 119 Kryminalnaha kodeksu Polščy.
Artykuł 119 zaviecca «Dyskryminacyja», ale tyčycca hvałtoŭnych dziejańniaŭ abo pahrozaŭ na padstavie nacyjanalnaj, etničnaj, rasavaj, palityčnaj ci relihijnaj prynaležnaści abo jejnaj adsutnaści. Artykuł 18 — pra formy saŭdziełu. Jon maje try častki: kiravańnie złačynstvam abo zahad učynić jaho; padbuchtorvańnie da złačynstva; spryjańnie šlacham pradstaŭleńnia pryłady, transpartu ci paradaŭ abo biaździejnaść u spynieńni złačynstva.
Adnosna padazravanaha ŭžytaja miera strymańnia ŭ vyhladzie izalacyi, viaducca dalejšyja pracesualnyja dziejańni i zbor dokazaŭ. Pa zbory materyjału budzie vystaŭlenaje abvinavačvańnie.
Polskaja prakuratura supolna z Ahiencyjaj unutranaj biaśpieki viaduć šmatpłanavaje rasśledavańnie adnosna napadaŭ na rasiejskich apazicyjanieraŭ, pieravažna źviazanych z Fondam baraćby z karupcyjaj, stvoranym Alaksiejem Navalnym u 2011 hodzie. Sprava datyčyć napadaŭ na rasiejskich aktyvistaŭ jak u krainach Jeŭropy, tak i ŭ Paŭnočnaj i Paŭdniovaj Amierycy.
Raniej stała viadoma, što siarod padazravanych pa spravie ab napadzie na rasiejskich apazicyjanieraŭ — rasiejski juryst Anatol Blinoŭ. Jon byŭ zatrymany 13 vieraśnia. Prakuratura vystaviła jamu try abvinavačvańni, u tym liku, u źbićci Vołkava «pa pryčynie jahonaj nacyjanalnaj palityčnaj prynaležnaści i palityčnaj dziejnaści». Blinoŭ aryštavany na try miesiacy.
Rasiejski «Fond baraćby z karupcyjaj» zajaŭlaje, što zamach na Leanida Vołkava 12 sakavika 2024 hoda byŭ zamoŭleny saŭładalnikam JUKOS Leanidam Nieŭźlinym, jaki daručyŭ jurystu Blinovu ŭsio arhanizavać. Nieŭźlin u svaju čarhu jašče 5 žniŭnia nakiravaŭ u litoŭskuju palicyju zajavu, u jakoj śćviardžaje, što Blinoŭ naŭmysna stvaraje ŭražańnie, što za napadam na Vołkava staić Nieŭźlin.
Padčas napadu na Vołkava złačynca raźbiŭ škło ŭ mašynie, raspyliŭ ślezaciečny haz i źbiŭ rasiejskaha apazicyjaniera małatkom, u vyniku čaho ŭ mužčyny była złamanaja ruka.
U krasaviku biahučaha hoda pa spravie ab zamachu byli zatrymanyja dvoje hramadzianaŭ Polščy — Ihar C. i Maksimilijan K. Abodvum vystavili abvinavačvańnie ŭ hvałcie na padstavie nacyjanalnaści i palityčnaj dziejnaści. Premjer-ministr Polščy Donald Tuskzajaŭlaŭ, što napad na Vołkava zamoviŭ hramadzianin Biełarusi.