U biełarusa kanfiskavali bolš za 6 młn rubloŭ-jon niezakonna handlavaŭ kryptavalutaj
Biełarus aformiŭ IP i dekłaravaŭ, što zajmajecca hramadskim charčavańniem.
25.09.2024 / 12:31
Ilustracyjnaje fota: Paul Yeung/Bloomberg via Getty Images
Sud kanfiskavaŭ 6,6 młn rubloŭ (bolš za 2 młn dalaraŭ) u IP, jaki zajmaŭsia niezakonnymi ździełkami z kryptavalutaj.
Pavodle źviestak śledstva, biełarus ź lipienia 2022 hoda da śniežnia 2023 hoda nielehalna zajmaŭsia apieracyjami, anałahičnymi dziejnaści apierataraŭ abmienu kryptavalut i apierataraŭ kryptapłatformaŭ, i pry hetym nie byŭ rezidentam PVT, paviedamlaje Viarchoŭny sud.
Dla hetaha jon arandavaŭ ofisnaje pamiaškańnie ŭ adnym z handlovych centraŭ Bresta, a taksama pryciahvaŭ najomnych rabotnikaŭ biez zaklučeńnia ź imi pracoŭnych abo hramadzianska-pravavych dahavoraŭ. Za paŭtara hoda žychar Bresckaj vobłaści ździejśniŭ 785 niezakonnych ździełak z kryptavalutami.
U sudzie mužčyna raspavioŭ, što asnoŭny vid jaho pradprymalnickaj dziejnaści — heta hramadskaje charčavańnie.
U vyniku IP aštrafavali na 6 tys. rubloŭ z kanfiskacyjaj 100% dachodu, što skłała 6,646 młn rubloŭ. U jaho taksama płanujuć kanfiskavać srodki ździajśnieńnia administracyjnaha pravaparušeńnia i spahnać ich košt na amal 12 tysiač rubloŭ.