У Чадзе затрымалі беларуса
У Чадзе затрымалі грамадзяніна Беларусі разам з расіянамі, паведамляе МЗС Расіі.
24.09.2024 / 09:59
Нджамена, Чад
«19 і 21 верасня ў Нджамене ўладамі Рэспублікі Чад былі затрыманыя трое грамадзян Расіі — Шугалей М.А., Суэйфан С. Хасан Алі, Цароў Е.І. і грамадзянін Беларусі Дзенісевіч А.А.», — гаворыцца ў паведамленні міністэрства.
Першымі былі затрыманыя Максім Шугалей і Самер Суэйфан, якіх расійская прапаганда называе расійскімі сацыёлагамі.
Праз два дні затрыманыя былі яшчэ два чалавекі — расеец Цароў Е.І. і грамадзянін Беларусі Дзенісевіч А.А. (іх поўныя імёны МЗС не называе).
«Камсамольская праўда» са спасылкай на крыніцу паведамляе, што «Шугалей адправіўся ў Нджамену для ўдзелу ў адкрыцці Рускага дома».
Шугалей і Суэйфан не першы раз аказваюцца ў такой сітуацыі. З траўня 2019 года яны ўтрымліваліся ў лівійскай турме па падазрэнні ва ўмяшанні ў мясцовыя выбары. Як пісаў Bloomberg, яны спрабавалі арганізаваць сустрэчу з сынам былога лідара краіны Муамара Кадафі Сейфам аль-Ісламам, які лічыцца патэнцыйным кандыдатам на пасаду прэзідэнта Лівіі. На той момант яны былі супрацоўнікамі Фонду абароны нацыянальных каштоўнасцяў, звязанага з Яўгенам Прыгожыным. Шугалея і Суэйфана вызвалілі з лівійскай турмы ў снежні 2020 года, піша РБК.
Прозвішча Дзенісевіча ў кантэксце беларуска-афрыканскіх сувязяў сустракаецца, напрыклад, у навінах пра набліжанага да Аляксандра Лукашэнкі бізнэсмена Аляксандра Зінгмана, які лічыцца ключавой фігурай у адносінах Беларусі і Зімбамбве. Жонку Зінгмана зваць Лізавета Дзенісевіч, піша «Люстэрка».