Rasijanie ŭdaryli pa Kryvym Rohu: zahinuli try čałavieki, u tym liku dzicia
Taksama paranienyja dvoje mužčyn i chłopiec.
21.09.2024 / 09:23
Fota: Dnieprapiatroŭskaja AVA
«Znoŭ strašnaja varožaja ataka na Kryvy Roh. Siarod nočy, kali horad spaŭ. Ciapier užo viadoma pra 3 zahinułych, siarod jakich — dzicia. Hłybokija spačuvańni rodnym … jość i paranienyja. Paškodžanyja pryvatnyja žyłyja damy. Bolš padrabiaznaściaŭ paśla», — raskazaŭ kiraŭnik vajskovaj administracyi Dnieprapiatroŭskaj vobłaści Siarhiej Łysak.
Jon dadaŭ, što paciarpieli mužčyny va ŭzroście 31 i 50 hadoŭ i 17-hadovy chłopiec. Paciarpiełych špitalizavali, ich stan siaredniaj ciažkaści.
Čynoŭnik paśla ŭdakładniŭ, što ŭ vyniku ŭdaru zaharelisia dva pryvatnyja damy, pažary ŭžo patušyli. Akramia taho, bolš za 20 damoŭ paškodžanyja, jašče 2 — razburanyja. Paškodžany budynak škoły, haraž i aŭto.
Rasijanie taksama abstralali Dniepr i Nikapalski rajon Dnieprapiatroŭskaj vobłaści.
«Dniapro. Pavodle ŭdakładnienaj infarmacyi, paškodžany taksama 6-paviarchovy navučalny korpus, tam vybityja vokny. A jašče źniaviečanyja 3 šmatpaviarchoŭki i 72 aŭto», — adznačyŭ jon.
Nikapalščynu akupanty pačali atakavać ź viečara 20 vieraśnia, — užyvali drony i artyleryju.
«Paciarpieli Nikapal, Pakroŭskaja i Miroŭskaja abščyny. Paranienaja 38-hadovaja žančyna. Jana ŭ balnicy ŭ stanie siaredniaj ciažkaści», — padkreśliŭ čynoŭnik.