Samalot, jaki lacieŭ z Osła ŭ Małahu, vymušana sieŭ u Danii z-za myšy
Avijakampanija Scandinavian Airlines (SAS) u piatnicu, 20 vieraśnia, vypuściła zajavu ab zdareńni ŭ minułuju sieradu incydencie z myššu ŭ samalocie, jaki lacieŭ sa stalicy Narviehii Osła ŭ Małahu ŭ Ispanii, piša Radyjo Svaboda.
21.09.2024 / 08:10
Piłoty byli vymušanyja ździejśnić terminovuju pasadku ŭ Kapienhahienie. Źmianieńnie maršrutu było praviedziena pa štatnaj pracedury, bo myš niesła pahrozu biaśpiecy palotu. U Kapienhahienie pasažyram prapanavali pierasieści na inšy samalot, jaki i dastaviŭ ich u Małahu.
Praviłami ekspłuatacyi samalotaŭ praduhledžany strohija abmiežavańni ŭ dačynieńni da hryzunoŭ na borcie, kab praduchilić pierahryzańnie elektrapravodki. Pa słovach pradstaŭnika kampanii SAS, takoje zdarajecca vielmi redka.
Pasažyr avijarejsa Osła — Małaha Jarle Barestad staŭ śviedkam incydentu i raspavioŭ kanału BBC News, što myš źbiehła sa skrynki ź ježaj, jakuju adkryła žančyna, jakaja siadzieła pobač.
Pa słovach Barestada, situacyja była spakojnaj, nichto nie vyjaŭlaŭ spałochu ci stresu. Adnak sam Jarle pryznaŭ, što nadzieŭ škarpetki pa-nad štanami, kab myš nie pranikła pad vopratku.
Heta druhi padobny incydent za minuły tydzień, paviedamlaje Bi-bi-si. Na dniach ruch ciahnikoŭ na poŭdni Anhlii byŭ spynieny na karotki čas, kab vysadzić z pasažyrskaha vahona dvuch vaviorak, heta zapatrabavała «asablivych vysiłkaŭ».