90-hadovy Poźnier vierniecca ŭ efir rasijskaha «Pieršaha kanała». Jahonaja prahrama pierastała vychodzić u 2022 hodzie
Viadomy televiadučy, jaki staranna paźbiahaŭ vykazvańniaŭ pra vajnu va Ukrainie, znoŭ źjavicca ŭ efiry.
18.09.2024 / 17:57
Uładzimir Poźnier. Fota: Wikimedia Commons
Rasijski viadučy Uładzimir Poźnier upieršyniu z pačatku paŭnamaštabnaj vajny Rasii suprać Ukrainy vierniecca ŭ efir rasijskaha «Pieršaha kanała». Jahonaja novaja prahrama budzie nazyvacca «Turecki sšytak», piša RBK. Heta nie rehularnaja pieradača, a vaśmisieryjny film, jaki kamanda Poźniera zdymała ŭ Turcyi na praciahu apošnich hadoŭ.
Poźnier, jaki sioleta adznačyŭ 90-hodździe, vioŭ svaju prahramu na «Pieršym kanale» na praciahu 14 siezonaŭ, braŭ intervju ŭ viadomych ludziej. Apošni vypusk prahramy «Poźnier» vyjšaŭ 21 lutaha 2022 hoda — za try dni da pačatku rasijskaha ŭvarvańnia va Ukrainu.
Sam Poźnier staranna paźbiahaŭ pramych kamientaroŭ pra vajnu. U sakaviku 2023 hoda jon upieršyniu vykazaŭsia na hetuju temu, abminuŭšy acenku samoj vajny, i parazvažaŭ pra jaje pryčyny, paŭtaryŭšy niekatoryja z tezisaŭ Uładzimira Pucina, uklučajučy temu pašyreńnia NATA na ŭschod i patencyjnaje ŭstupleńnie Ukrainy ŭ aljans. Jon taksama zaklikaŭ nie nazyvać Pucina varjatam.
«Pryčyna taho, što Pucin zrabiŭ, u pryncypie, vielmi prostaja — prasačyć za tym, kab u Ukrainy nie było mahčymaści stać členam NATA. Ni ciapier, što i tak było niemahčyma, ni ŭ budučyni. Nakolki ja mahu mierkavać, sutnaść spravy ŭ hetym. Ci zhodny ja z tym, što jon zrabiŭ, i z tym, jakim šlacham heta było zroblena, — zusim inšaje pytańnie. I nie maje značeńnia, z čym ja zhodny abo nie zhodny — heta tolki moj asabisty punkt hledžańnia. Važnyja fakty», — skazaŭ tady Poźnier.
Poźnier taksama pryznaŭsia, što atrymlivaŭ prapanovy pracy ad zachodnich telekanałaŭ, ale nie moh ich pryniać, pakolki ad jaho patrabavałasia publična vykazacca pra vajnu, čaho jon nie choča rabić.
Pamior amierykanski televiadučy Fił Donachju
Uładzimir Poźnier adčuŭ soram za žurnalistaŭ, ale naŭrad ci za rasijskich
Piaskoŭ zajaviŭ ab niebiaśpiecy pajezdak u Hruziju paśla incydentu z Poźnieram