Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной
Малодшы сын Аляксандра Лукашэнкі сыграў партыю на раялі перад сабранымі на «Мінск-Арэне» з нагоды «Дня народнага адзінства» прыхільнікамі ўлады.
17.09.2024 / 19:39
Скрыншот з відэа
Выступленне Колі Лукашэнкі працягвалася 6 хвілін і было заяўлена ў рамках праграмы «Славянскае сузор'е», падрыхтаванай выкладчыцай кафедры спецыяльнага фартэпіяна Беларускай дзяржаўнай акадэміі музыкі Аленай Асташкінай-Мысліўчык.
Сама Алена Асташкіна-Мысліўчык, ураджэнка ўкраінскага Закарпацця, іграла на другім раялі. Акампаніраваў ім Прэзідэнцкі аркестр.
Пафаснаму канцэрту папярэднічала доўгая прамова Аляксандра Лукашэнкі, у якой ён страшыў беларускі народ і краіны Захаду Трэцяй сусветнай вайной.
Асобна Аляксандр Лукашэнка засцярог Украіну ад збіцця расійскіх шахедаў над тэрыторыяй Беларусі. І патлумачыў, чаму ў Беларусі маўчаць, што яны лётаюць праз яе туды-сюды.
«Павінен вам адкрыта заявіць: мы дамовіліся па каналах з украінцамі, што мы не будзем у СМІ падсвятляць факты залёту беспілотнікаў, і расейскіх і ўкраінскіх, на нашу тэрыторыю», — заявіў Лукашэнка.
Пры гэтым ён абвінаваціў ЗША ў тым, што яны загадалі Кіеву, калі складуцца абставіны, атакаваць нашу інфраструктуру па паўднёвай мяжы.
«Я хачу спытаць у амерыканцаў: вы міру хочаце, мірных перамоваў ці эскалацыі сітуацыі? Я нездарма гэта пытаюся. Таму што яны апошнім часам вельмі часта намякалі пра перамовы. І нават высунулі ўмову. Мы пагадзіліся. А як тады гэта разумець?»
«Мы ведаем пра ўсе іх задумы, і нічога ў іх не атрымаецца», — заявіў Лукашэнка.
На думку Лукашэнкі, ягоны галоўны саюзнік, пуцінская Расія, здолее адкінуць украінскія войскі з Курскай вобласці.
«Хачу папярэдзіць нашых праціўнікаў, нашых супернікаў. І тых, хто не разумее яшчэ. Не трэба гэта рабіць. Напад на Беларусь — гэта Трэцяя сусветная вайна», — заявіў Лукашэнка.
А каб хто раптам не падумаў, што гэта проста словы, ён яшчэ падмацаваў сваю грозную рыторыку:
«Я ўжо казаў: беларускую міралюбнасць не варта разумець і прымаць за слабасць. Калі я кажу пра гэта, вы не падумайце, што я блефую або згушчаю фарбы. Не. Як ніколі раней нам ёсць чым адказаць».
Лукашэнка патлумачыў, чаму ў Беларусі маўчаць, што праз яе туды-сюды лётаюць расійскія шахеды
Лукашэнка: Напад на Беларусь — гэта Трэцяя сусветная вайна, я не блефую
Рэжым Лукашэнкі дапусціў свой удзел у другім мірным саміце па Украіне. Але пры адной умове