Рэаліі расійскай правінцыі: пакуль муж быў на фронце, жонка пайшла да іншага. Сужыхар яе забіў і таксама пайшоў на вайну
Цяпер дачка забітай жанчыны можа трапіць у прытулак, паколькі яе айчыма хочуць вярнуць на фронт, расказвае «Холод».
17.09.2024 / 20:13
Сяргей Ягораў і ягоная падчарка Дарына. Фота: «Холод»
У расійскай Якуціі дзяўчынка-падлетак, чыю маці забіў сужыхар, а айчыма мабілізавалі, можа трапіць у дзіцячы дом. Сяргею Ягораву, які з'ехаў з фронту, пагражаюць прымусовым вяртаннем на вайну за тое, што ён не захацеў пакідаць падчарку адну пасля забойства яе маці.
Гісторыя адбылася ў маленькім сяле Кячы. У 2015 годзе Ягораў пазнаёміўся ў Якуцку з маладой маці Марыяй Ачыкасавай. У іх завязаліся адносіны, і яны вырашылі перабрацца ў роднае сяло Марыі.
У кастрычніку 2022 года Сяргей паехаў праведаць сваякоў на сваю малую радзіму — за 800 кіламетраў ад Кячы. Там яго ўжо чакала позва па мабілізацыі. Ягораў хавацца не стаў:
«Не ведаю, як іншыя, а я ні секунды не сумняваўся, нікуды не хаваўся. Мяркуйце самі: пакуль я жыў у роднай вёсцы, я быў настаўнікам АБЖ. Як я мог уцякаць, калі столькі гадоў вучыў школьнікаў патрыятызму?»
Перад ад'ездам на вайну Ягораў распісаўся з Марыяй і ўдачарыў яе дачку Дарыну, «каб дзяўчынкам дапамагалі, калі ён загіне». Ваяваць яго адправілі ў Запарожскую вобласць. Ягораў расказвае, што купляць экіпіроўку і бытавыя рэчы яму даводзілася за свае грошы. Акрамя таго, камандаванне нібыта абяцала яму медаль за «добрую справу», але так і не ўзнагародзіла.
У студзені Марыя патэлефанавала мужу на фронт і паведаміла, што пайшла да іншага мужчыны. Прычым дачку з сабой не забрала: па яе прыйшлі органы апекі. Ягораў дыстанцыйна ўгаварыў чыноўнікаў аддаць дзяўчынку бабулі. А ў жніўні ён змог прыехаць у Кячы да падчаркі — яму далі першы адпачынак.
Аказалася, што Марыя наогул знікла. Праз некалькі тыдняў яе цела знайшлі ў райцэнтры за 25 кіламетраў ад дома. Забіў яе сужыхар Уладзіслаў Карнілаў: ён двойчы стрэліў у жанчыну ва ўпор са стрэльбы 12-га калібра. Пра забойства ён расказаў адной са сваіх былых сужыхарак, якіх у яго было шмат. Неўзабаве Карнілава затрымалі.
У студзені 2024 года Карнілаву прызначылі 8 гадоў калоніі строгага рэжыму, пасля апеляцыі гэты тэрмін павялічылі да 10 гадоў. Ягораў таксама падаў грамадзянскі пазоў на адрас забойцы жонкі, але ў ліпені на чарговым пасяджэнні суда ён даведаўся, што вытворчасць па справе спыненая. Таму што Карнілаў завербаваўся на вайну і быў вызвалены ад пакарання.
Гэта навяло Ягорава на думку, што ў Расіі пачынаецца бардак.
«Калі шчыра, гэта ўжо пачынаецца бардак у Расіі. Аказалася, што закона ў краіне наогул няма. Усіх вінаватых цяпер адпраўляюць на вайну — як яны там будуць адказваць за свае злачынствы? Вінаваты павінен адказваць за свае ўчынкі і сядзець у турме, а не так: год адваяваў, вярнуўся і жыве спакойна. Што ён натворыць яшчэ, невядома», — кажа Ягораў.
Яго самога хочуць вярнуць на фронт. Са студзеня ім актыўна цікавіцца вайсковая паліцыя — там мяркуюць, што ён самавольна пакінуў часць. З-за таго, што Ягораў знаходзіцца ў падвешаным стане, Дарынай цікавяцца органы апекі. Там мужчыну сказалі «аддаць дзяўчынку ў прытулак і ісці абараняць радзіму».
Звольніцца з войска мабілізаваныя могуць толькі ў выключных выпадках. Ягораў хацеў звольніцца як бацька-адзіночка дзіцяці да 16 гадоў, рассылаў лісты і запісваў відэазвароты, аднак чыноўнікі і сілавікі справу зацягвалі. Мяркуючы па ўсім, яны чакалі адпаведнага моманту — 17 жніўня Дарыне споўнілася 16, і цяпер у Ягорава няма падстаў для звальнення.
Экс-баец ПВК «Вагнер» жорстка забіў сваю цяжарную дзяўчыну з-за зламанай акустычнай калонкі