Arnold Švarcenehier stanie niamieckim doktaram
Lehiendarny kinaakcior, bodzibiłdar i były hubiernatar štata Kalifornija jedzie ŭ stalicu Hiermanii, kab asabista pryniać hanarovuju stupień Honoris Causa ŭ pryvatnym Bierlinskim univiersitecie Hertie School.
17.09.2024 / 12:09
Arnold Švarcenehier. Fota: AP Photo/Damian Dovargane
Hetaja navučalnaja ŭstanova rychtuje śpiecyjalistaŭ pa hramadskaj palitycy, u tym liku dla pracy na dziaržaŭnych pasadach i ŭ biznesie. 77-hadovy Švarcenehier stanie hanarovym doktaram za svaje zasłuhi pa abaronie navakolnaha asiarodździa i zachavańni ekałahičnaj raŭnavahi, paviedamlaje telehram-kanał «Što tam u niemcaŭ».
Jak zajaviła kiraŭnik univiersiteta Karnelija Uoł, hanarovy tytuł — heta pryznańnie pieradavoj dziejnaści Švarcenehiera, jaki staviŭ u asnovu palityčny ŭdzieł u ekaabaronie i navukova abhruntavanyja rašeńni, niezaležnyja ad partyjnych ustanovak.
«Jaho prychilnaść achovie pryrody, suviaź z hramadzianskaj supolnaściu i jaho navatarskaja palityka akazvajuć vialiki ŭpłyŭ na hłabalnuju dyskusiju ab źmianieńni klimatu i pa hety dzień», — adznačyła Uoł.
Padzieja budzie značnaj nie tolki dla Bierlina, ale i dla ŭsioj Hiermanii.
Cyrymoniju ŭručeńnia hanarovaj stupieni Švarcenehieru naviedaje i navat vystupić tam z pramovaj vice-kancler FRH, ministr ekanomiki i abarony klimatu, a taksama sustaršynia partyi «Zialonyja» Robiert Chabiek.
Hertie School — anhłamoŭnaja ŭstanova, ale, viadoma ž, vielmi cikava, ci skaža eks-hubiernatar Kalifornii, jaki naradziŭsia ŭ Aŭstryi, što-niebudź pa-niamiecku?
Švarcenehier nabyŭ asablivuju viadomaść nie tolki jak akcior i palityk, ale i svajoj anhažavanaściu ŭ baraćbie suprać źmieny klimatu. Siarod inšaha, jon zasnavaŭ Mižnarodnuju arhanizacyju Schwarzenegger Climate Initiative, jakaja padtrymlivaje ekaprajekty pa ŭsim śviecie.
«Ja krychu bolš staŭ mašynaj». Arnoldu Švarcenehieru pastavili kardyjastymulatar
Arnold Švarcenehier pakarmiŭ svaju aślicu Łułu ŭ žyvym efiry spartyŭnaha šou
U miunchienskim aeraporcie zatrymali Arnolda Švarcenehiera