Debaty Trampa i Charys. Hałoŭnaje
Uviečary 10 vieraśnia ŭ Fiładelfii vice-prezident Kamała Charys (kandydat ad demakrataŭ) i eks-prezident Donald Tramp (kandydat ad respublikancaŭ) sustrelisia na teledebatach. Na praciahu 90 chvilin jany adkazvali na pytańni, paviedamlaje «Hołas Amieryki».
11.09.2024 / 07:21
Fota Alex Brandon / AP
Ciapierašnija debaty — važny momant prezidenckaj honki napiaredadni vybaraŭ 5 listapada. Nacyjanalnyja apytańni pakazvajuć, što razryŭ pamiž kandydatami pa-raniejšamu vielmi nievialiki.
Donald Tramp i Kamała Charys vyjšli na scenu debataŭ u aŭtorak viečaram, pacisnuŭšy adno adnamu ruki. Pierad debatami mnohija naziralniki zadavalisia pytańniem, jak Charys i Tramp, jakija nikoli nie sustrakalisia, buduć vitać adno adnaho.
Charys padyšła da Trampa na scenie, praciahnuła jamu ruku i pradstaviłasia. Kandydaty pacisnuli adno adnamu ruki.
Pra inflacyju, biespracoŭje i pošliny
Va ŭstupnym słovie Charys pradstaviła siabie jak pierśpiektyŭnaha kandydata i skazała, što Tramp na debatach budzie prytrymlivacca «taho ž źbitaha scenaru».
«Ja vieru ŭ ambicyi, pamknieńni, mary amierykanskaha naroda, i mienavita tamu ŭ mianie jość płan pa stvareńni taho, što ja nazyvaju ekanomikaj mahčymaściaŭ», — skazała Charys.
«Pasłuchajcie, u nas žudasnaja ekanomika praź inflacyju, jakaja nasamreč razburaje krainu», — skazaŭ Tramp.
Charys padvierhła krytycy namier Trampa pavialičyć pošliny na impart zamiežnych tavaraŭ — jana paraŭnała hetuju prapanovu z padatkam z prodažaŭ dla siaredniaha kłasa — u toj ža čas pradstaŭlajučy svoj płan ab vydzialeńni padatkovych ilhot amierykanskim siemjam.
«Heta nie pryviadzie da pavyšeńnia cen», — skazaŭ Tramp, abaraniajučy svaju prapanovu ab uviadzieńni pošlin na impart tavaraŭ.
«Donald Tramp pakinuŭ nam samaje vysokaje biespracoŭje z časoŭ Vialikaj depresii», — skazała Charys, majučy na ŭvazie hady prezidenctva Trampa z 2017 da 2021 hoda. — Toje, što my zrabili, — heta naviali paradak u biesparadku, učynienym Donaldam Trampam».
Tramp raskrytykavaŭ Charys za inflacyju, jakaja nazirałasia ŭ pieryjad kiravańnia administracyi Džo Bajdena, choć i pierabolšyŭ uzrovień rostu koštaŭ.
Jon taksama chutka pierajšoŭ da prablemy imihracyi, znoŭ biazdokazna zajaviŭšy, što imihranty z «varjackich damoŭ» pierasiakajuć paŭdniovuju miažu ZŠA ź Mieksikaj.
Inflacyja, pavodle jaho słoŭ, «stała katastrofaj dla ludziej, dla siaredniaha kłasa, dla ŭsich kłasaŭ».
Pandemija COVID-19
«Ale toje, što zrabiŭ Donald Tramp, davajcie pahavorym pra heta, z COVID, jon faktyčna padziakavaŭ staršyni [KNR] Si [Czińpinu] za toje, što toj zrabiŭ padčas pandemii», — skazała Charys.
Pytańnie abortaŭ
Tramp vyrašyŭ abaranić rašeńnie Viarchoŭnaha suda ZŠA 2022 hoda, jakoje admianiła kanstytucyjnuju abaronu prava na abort i pieradało hetaje pytańnie na mierkavańnie asobnych štataŭ.
«Ja akazaŭ usim vialikuju pasłuhu, zrabiŭšy heta. Dla hetaha patrabavałasia mužnaść», — skazaŭ Tramp na teledebatach.
Charys vykazała abureńnie śćviardžeńniem Trampa ab tym, što pieradača pytańnia abortaŭ na ŭzrovień štataŭ było papularnym rašeńniem, spasłaŭšysia na štaty, dzie byli ŭviedzienyja strohija abmiežavańni.
«Ludzi hetaha chacieli? — spytała Charys. — Ludziej pazbaŭlajuć dapamohi ŭ adździaleńniach chutkaj dapamohi, tamu što miedycynskija rabotniki bajacca apynucca za kratami?»
Trampa spytali, ci nakłaŭ by jon vieta na fiederalnuju zabaronu na aborty, kali b taki zakon byŭ pryniaty Kanhresam. Jon zajaviŭ, što hetaha nikoli nie adbudziecca, ale admoviŭsia dać kančatkovy adkaz na pytańnie.
Pra Izrail i Ukrainu
Adkazvajučy na pytańnie maderatara ab napadzie bajevikoŭ CHAMAS na Izrail 7 kastryčnika 2023 hoda, Tramp paŭtaryŭ svoj tezis, jaki ŭžo hučaŭ raniej, što napadu b nie adbyłosia, kali b jon byŭ prezidentam ZŠA.
Padobnuju zajavu jon ahučyŭ i datyčna poŭnamaštabnaha rasijskaha ŭvarvańnia va Ukrainu, zajaviŭšy, što, kali b jon byŭ u prezidenckim kreśle, «Rasija nikoli b nie ŭvarvałasia va Ukrainu», dadaŭšy, što «dobra viedaje» prezidenta RF Uładzimira Pucina i prezidenta Ukrainy Uładzimira Zialenskaha.
Tramp praciahnuŭ: «Zirnicie na situacyju z chusitami i Jemienam, z tym, što adbyvajecca na Blizkim Uschodzie, — hetaha b nie adbyłosia. Ja b vyrašyŭ heta chutka. Vajna pamiž Ukrainaj i Rasijaj skončyłasia b, kali b mianie vybrali prezidentam, — ja b zaviaršyŭ jaje jašče da taho, jak staŭ prezidentam».
U adkaz Charys zajaviła, što palityka jaje apanienta ŭ pytańniach nacyjanalnaj biaśpieki i zamiežnaj palityki «słabaja i niapravilnaja». «Dobra viadoma, što jon lubić dyktataraŭ», — skazała kandydatka ad demakrataŭ, dadaŭšy, što «jak jon sam kazaŭ, jon chacieŭ by sam stać dyktataram z samaha pieršaha dnia [u Biełym domie]».
«Dobra viadoma, što jon skazaŭ Pucinu, što toj moža rabić usio, što jamu ŭzdumajecca, uryvacca va Ukrainu; dobra viadoma, što jon nazvaŭ «hienijalnym» momant, kali Rasija ŭvarvałasia va Ukrainu», — skazała Charys.
Vice-prezident taksama abvinavaciła kandydata ad respublikancaŭ u tym, što toj vietliva staviŭsia da kiraŭnika KNDR Kim Čen Yna. Charys miarkuje, što dyktatary i aŭtakraty čakajuć viartańnia Trampa na pasadu prezidenta, tamu zmohuć im manipulavać.
Apytańnie, praviedzienaje ŭ žniŭni Associated Press — NORC, pakazała, što amierykancy nie addajuć pieravahi nivodnamu z kandydataŭ u pytańni vyrašeńnia vajny va Ukrainie. Kala 40% respandentaŭ zajavili, što daviarajuć abodvum pretendentam na prezidenckuju pasadu pa hetym pytańni.