Чыноўнікі прыдумалі, як вырашыць праблему з шумным скейт-паркам у Мінску
У перспектыве плануецца абнесці парк плотам і зачыняць на ноч, а пакуль на скейтараў будуць выклікаць міліцыю.
05.09.2024 / 16:00
Фота: koko.by
У парку Уга Чавеса ў сталічнай Каменнай Горцы нядаўна адкрыўся самы вялікі ў Мінску скейт-парк. Аднак такое суседства не вельмі спадабалася мясцовым жыхарам.
Яны скардзяцца на шум: скейтары пачынаюць катацца з чацвёртай раніцы, а заканчваюць часам апоўначы. Пасля скаргаў адміністрацыя парку павесіла шыльды: яны паведамляюць, што наведваць парк з 23.00 да 7.00 забаронена. Аднак скейтары ўсе папярэджанні ігнаруюць.
У «Мінскзелянбудзе» вырашылі адрэагаваць на сітуацыю наступным чынам: на скейтараў і самакатчыкаў, якія парушаюць рэжым цішыні, будуць выклікаць міліцыю, пішуць «Мінск-Навіны».
«У цяперашні час на тэрыторыі пляцоўкі размешчаныя інфармацыйныя шыльды аб забароне дзеянняў, якія выклікаюць шум у позні час (з 23:00 да 7:00).
У сувязі з тым, што за парушэнне гэтага прадпісання прадугледжаная адміністрацыйная адказнасць, дыспетчарам службы аховы даручана выклікаць на месца міліцыянераў», — паведамілі камунальнікі.
У будучыні плануецца паставіць вакол пляцоўкі плот і зачыняць вароты на ноч.
Жыхары Каменнай Горкі скардзяцца на суседства са скейт-паркам. Моцна скрыгоча і замінае спаць
У Мінску створаць парк на зямлі, вывезенай з будаўніцтва метро
У Мінску адкрыўся абноўлены парк імя Уга Чавеса