«Umka» staŭ ščyravać na «Biełaruśkalii»
Ciozka lubimaha špica Łukašenki vydaŭ pieršyja tony kalijnaj rudy.
05.09.2024 / 13:45
Foto: t.me/belaruskali
Biełaruski vyjemačny kambajn «Umka-550» vydaŭ pieršyja tony kalijnaj rudy ŭ šachtach «Biełaruśkalija».
Kambajn, jaki nazvali hetak ža, jak i špica Łukašenki, zamienić niamiecka-biełaruski SL 300/400. Jaho vyrablali niamieckaja kampanija Eickhoff, ź jakoj «Biełaruśkalij» supracoŭničaŭ dziesiacihodździ, i salihorskaja firma «Chołdynh-Ipr». Hety kambajn pracavaŭ na rudnikach «Biełaruśkalija» z 2013 hoda, piša vydańnie «Biełarusy i rynak».
Ciapier kampanija ŭziała kurs na impartazamiaščeńnie. Paviedamlajecca, što łakalizacyja kambajna «Umka-550» vytvorčaści salihorskaha «Mašchimprama» vyrasła z 20% da 80%. Raspracoŭvali anałah niamieckaha kambajna paŭtara hoda.
Kiraŭnik «Biełaruśkalija» Ivan Hałavaty ličyć, što «Umka» ni ŭ čym nie sastupaje svajmu papiaredniku.
«Vyrab kambajna praktyčna zaviaršyŭ prahramu impartazamiaščeńnia dla rudnika i ciapier biełaruskija vytvorcy asvoili ŭsiu liniejku abstalavańnia, jakoje dazvalaje zabiaśpiečyć zdabyču rudy i vydaču jaje na pavierchniu dla nastupnaj pierapracoŭki, pryčym ź jakaściu, jakaja čaściakom pieravyšaje impartnyja anałahi», — śćviardžaŭ Hałavaty.
«Mašchimpram» paviedamlaŭ, što na vyrab adnaho «Umki» patrabujecca 6-7 miesiacaŭ. Zaraz kambajn znachodzicca na etapie pramysłovych vyprabavańniaŭ z metaj paćviardžeńnia zajaŭlenych vytvorcam techničnych charaktarystyk.