Dla kaho byli apošnija zajavy Juryja Vaskrasienskaha?
Tłumačyć redaktar «Našaj Nivy».
05.09.2024 / 11:48
Narada ŭ adnoj sa struktur Ministerstva ŭnutranych spraŭ. Fota pres-słužby viedamstva
U efiry Ryhora Azaronka Juryj Vaskrasienski kazaŭ pra vyzvaleńnie palitviaźniaŭ.
«Ideałohija — heta dobra, ale byćcio vyznačaje śviadomaść», — kazaŭ jon.
Jon tłumačyŭ nieabchodnaść adlihi ekanamičnymi patrebami.
«Ideałohija — heta dobra, ale byćcio vyznačaje śviadomaść. Saviecki Sajuz pavalili, mienavita naniosšy ŭdar pa ekanomicy, a potym pajšło ŭsio razłažeńnie.
Viadoma, kali pojdzie havorka, [kab] adpuścić jašče niejkuju partyju [palitviaźniaŭ] uzamien na admienu sankcyj, my možam razhledzieć usie pytańni. Tamu što nam treba płacić piensii, nam treba ŭtrymlivać paradzich, dekretnic, hadavać dziaciej. Viadoma, my možam pajści na abmien.
Što nam važniej? Adpuścić 50 zmaharoŭ i spakojna zabiaśpiečyć napaŭnieńnie biudžetu? Ci kab jany siadzieli?»
Takim čynam, Vaskrasienski pryznaŭ, darečy, što palitviaźni źjaŭlajucca faktyčna zakładnikami — tak nacysty ŭ vajnu brali zakładnikaŭ na akupavanych terytoryjach, kab šantažavać praciŭnika, padpolle. I taksama pryznaŭ, što handal palitviaźniami padpadaje, faktyčna, pad isny artykuł Kryminalnaha kodeksa ab handli ludźmi.
Vaskrasienski jak taki byŭ stvorany, kab chłusić hramadstvu i Zachadu. Ale i hramadstva, i Zachad mudryja, ich ciažka padmanuć, u hetym sensie razumna, što jaho skiravali na apracoŭvańnie aŭdytoryi azaronkaŭ i bondaravych — taho niešmatlikaha słoju, jakaja padtrymlivaje represii i radujecca im. Voś im Vaskrasienski i tłumačyć, dla čaho spatrebiŭsia razvarot u pavietry.
Nijakaj krytyčnaj situacyi z vypłatami paradzicham i dekretnicam niama, biudžet napoŭnieny — kryvavyja, praŭda, to hrošy, atrymanyja ŭzamien za absłuhoŭvańnie impieryjalistyčnaj vajny. Ale napoŭnieny biudžet.
Vyzvalić palitviaźniaŭ Minsku dyktujuć nie niepasrednyja ekanamičnyja patreby, a siarednieterminovyja ryzyki. Represii paralizujuć tvorčy patencyjał hramadstva i vyklikajuć emihracyju. Miž tym Maskva nie dabiłasia va Ukrainie taho, što chacieła. I dynamika ŭsio horšaja dla Rasii: užo sam pieranos teatra vajennych dziejańniaŭ u Kurskuju vobłaść pakazalny. Mir, zaklučany Rasijaj na niavyhadnych dla jaje ŭmovach, budzie aznačać dla Minska najpierš źnižeńnie rasijskich datacyj i zakazaŭ dla VPK. A ciapier kraina dasiahnuła takoj stupieni ekanamičnaj zaležnaści ad Rasii i izalacyi ad čatyroch ź piaci susiedziaŭ, jakoj jašče nikoli nie było. Nikomu nie chočacca być vasałam, a tut i abvalicca možna.
Tamu Minsk i pačaŭ vyzvalać palitviaźniaŭ. Ale voś što važna:
- Minsk praciahvaje pastaŭlać zbroju Rasii dla viadzieńnia impieryjalistyčnaj vajny.
- Prapahanda nianaviści zachoŭvaje toj ža maštab, jaki nabyła ŭ 2020-m. Raspalvańnie mižnacyjanalnaj varožaści — u tym liku da Ukrainy, narodaŭ Zachadu, nie spyniłasia.
- Represii praciahvajucca ŭ tym ža maštabie, jaki jany nabyli ŭ 2021-m, jany našmat bolšyja, čym byli ŭ 2020-m, nie kažučy pra raniejšy pieryjad, navat publičnaja rytoryka karnych orhanaŭ nie źmianiłasia.
- Katavańni palitviaźniaŭ i zatrymanych za palityku nie spynilisia. Na Akreścina dziaŭčaty pa-raniejšamu śpiać na bietonie biez matracaŭ, asudžanych hnajać u SIZA. Palinu Šarendu mučać tym samym sposabam, jakim Alesia Puškina daviali da śmierci.
- Za kratami zastajucca Siarhiej Cichanoŭski, Viktar Babaryka i jahony syn, nobieleŭski łaŭreat Aleś Bialacki, Mikoła Statkievič, Maryna Zołatava i Ludmiła Čekina, Pavieł Sieviaryniec, Źmicier Daškievič, Pavieł Biełavus. Dy što tam, pieraličvać možna biaskonca — 98% palitviaźniaŭ zastajucca za kratami.
- Ludzi na chatniaj chimii farmalna nie ličacca palitviaźniami, ale jany taksama represavanyja. Nivodnaha ź ich jašče nie pamiłavali.
- Łukašysty starajucca prynizić u vačach biełarusaŭ Jeŭrasajuz i jaho krainy, pakazać ich słabymi i niepaśladoŭnymi, dabiŭšysia źniaćcia sankcyj biez vykanańnia raniejšych bazavych patrabavańniaŭ.
Što ž, dobra, što viaźni vychodziać, što dzieci buduć raści z baćkami, ale my pamiatajem i pra pieraličanaje vyšej.
{DONATE_PAYPAL}