Vasileŭskaja zorka: prapahanda narešcie stvaryła aficyjny akaŭnt u instahramie dla kaśmičnaj turystki
Stary akaŭnt Maryny Vasileŭskaj u instahramie niečakana zrabili adkrytym — ale papiarednie vydalili adtul usie fotazdymki. Zatoje stvaryli dla jaje novuju, ideałahična vyvieranuju staronku.
02.09.2024 / 17:00
Maryna Vasileŭskaja. Tut i dalej fota ź jaje instahramu
Niknejm dla instahrama pieršaj ajčynnaj kaśmičnaj turystki abrali vasileuskaya_zorka, i navat šapku profilu zrabili na biełaruskaj movie. Tam paznačana, što Maryna źjaŭlajecca hierainiaj Biełarusi i ŭznaharodžana rasijskim ordenam Haharyna. Zhadany i Biełaruski fond miru — niadaŭna Vasileŭskaja atrymała pasadu namieśnika staršyni praŭleńnia pa mižnarodna-miratvorčaj i humanitarnaj dziejnaści.
Pakul što ŭ novym akaŭncie ŭsiaho tolki dva dopisy. U pieršym — fota ŭ skafandry, jakoje rabili pierad palotam u kosmas. U druhim — foty časoŭ pracy ściuardesaj u «Biełavia». Maryna ŭ čarhovy raz staranna paŭtaraje prydumanuju dla jaje lehiendu: «Adlataŭšy 7 ščaślivych hadoŭ, ja ŭ dumkach adpraviła zapyt u Suśviet, što chaču vyšej. Ja zaŭsiody imknułasia da spaznańnia novaha, śvietłaha, dobraha, i daroha da zorak akazałasia realnaj! Kosmas vybraŭ mianie!»
U storys Maryna ŭ asnoŭnym pakazvaje fotazdymki ź ideałahičnych mierapryjemstvaŭ, u jakich udzielničaje, i repościć naviny aficyjnych ŚMI pra siabie.
Nahadajem: biełaruskaja prapahanda ad samaha pačatku bijahrafiju Maryi Vasileŭskaj sprabavała napisać amal što z nula, pakinuŭšy ŭ jaje historyi šmat biełych plam. Naprykład, čamuści sprabavali schavać i sudzimaść baćki, i niaŭdały šlub, i pieršyja miescy pracy.
Navat pra vyšejšuju adukacyju dziaŭčyny (byli pytańni, ci jość u jaje choć jaki-niebudź dypłom) saromielisia kazać. Ale ŭ apošniaha punktu jość bolš-mienš łahičnaje tłumačeńnie. Bo spačatku va ŭsich navinach, pryśviečanych adboru biełaruski dla palotu ŭ kosmas, pisali: «Svaje zajaŭki na palot u Biełarusi padali bolš za 3 tysiačy čałaviek. Kryteryi adboru kandydatak byli žorstkija: uzrost — 25-40 hadoŭ, vyšejšaja adukacyja pa kirunkach «fizika», «chimija», «bijałohija», «matematyka», «rakietna-kaśmičnaja technika». Abaviazkovaj umovaj było taksama viedańnie anhlijskaj movy». I va ŭsim śviecie sapraŭdy tak: kasmanaŭtki majuć dypłomy surjoznych VNU i navukovyja pracy. Maryna Vasileŭskaja skončyła pryvatny Minski inavacyjny ŭniviersitet pa śpiecyjalnaści «mieniedžar-ekanamist».
Stary instahram Maryny Vasileŭskaj isnavaŭ z 2016 hoda. U im na momant palotu biełaruski ŭ kosmas było 18 pastoŭ. Chutčej za ŭsio, užo tady jaho dobra pačyścili. Adtul papiarednie vydalili navat kala 900 staronak, na jakija była padpisana Maryna. Naŭrad ci tam było niešta kramolnaje. Ale heta ŭ čarhovy raz śviedčyć, jak prapahanda saromiejecca taho, što ŭ hieraini Biełarusi było zvyčajnaje dahierojskaje žyćcio.
Stała viadoma, dzie ŭsio ž vučyłasia kasmanaŭtka Maryna Vasileŭskaja
Hierainia Biełarusi ci zvyčajnaja kaśmičnaja turystka? Niuansy palotu ŭ kosmas Maryny Vasileŭskaj
Pytańnie, ci źjaŭlajecca Maryna Vasileŭskaja prafiesijnaj kasmanaŭtkaj, prajaśniŭ «Raskosmas»