«Kab prymusić Rasiju da spraviadlivaha miru». Zialenski patłumačyŭ ukrainski nastup na Kurskuju vobłaść
Pra heta prezident Ukrainy raspavioŭ u intervju pradstaŭnikam indyjskich ŚMI, paviedamlaje infarmacyjnaje ahientstva UNIAN.
25.08.2024 / 19:07
Zialenski adkazaŭ, dla čaho Ukrainie «Kurskaja apieracyja». Fota: president.gov.ua
Adkazvajučy na pytańnie ab Kurskaj apieracyi, jon zaznačyŭ, što heta «častka vialikaj vajenna-palityčnaj, vajenna-dypłamatyčnaj apieracyi».
«Usio, što my robim, robicca tolki dla taho, kab prymusić Rasiju być hatovymi da spraviadlivaha miru. Kurskaja apieracyja nie dazvoliła im zachapić našu Sumščynu i asłabić našy pazicyi, i ŭzmacnić ich pazicyi znoŭ», — skazaŭ Zialenski.
Jon dadaŭ, što Ukrainie było vielmi ciažka biez dapamohi partnioraŭ doŭhi čas.
«I nam było vielmi składana pierachapić inicyjatyvu. I nam heta treba było zrabić. I heta adzin z etapaŭ hetaj zadumy. I vy jaho ŭbačyli. Jon spracavaŭ. Ale jon spracavaŭ mienavita dla taho, dla čaho ja kažu. Da kanca ŭsie mety hetych našych krokaŭ ja nie mahu vam raskazać. Kali ŭsio skončycca, kali ŭ nas atrymajecca, stanie vidavočnym, dla čaho i što my rabili», — adznačyŭ kiraŭnik dziaržavy.
Taksama na pytańnie ab tym, jakim moža być šlach da miru, Zialenski adznačyŭ:
«Liču, što naš padychod, kali my havorym ab našych krokach, jak na poli boju, tak i ŭ dypłamatyčnym napramku, — naš padychod bližejšy da miru, čym lubyja inšyja prapanovy».
Jon dadaŭ, što hety šlach vielmi składany, i ŭžo byli pačuty prapanovy ad mnohich krain śvietu.
«Ja liču, što na siońnia ŭsio toje, što hučyć, — pakul što heta palityčnyja zajavy. Heta nie šlach. Heta nie formuły jakija-niebudź. Heta nijakaja nie kankretyka», — skazaŭ kiraŭnik Ukrainy i adznačyŭ, što «niama ni ŭ kaho nijakaha płana».
Zialenski taksama adznačyŭ, što prezident Rasii Uładzimir Pucin nie baicca «palityčnych zapałochvańniaŭ», a na dypłamatyčnyja kroki jon adkazvaje čarhovymi ŭdarami pa Ukrainie i zabojstvami ŭkraincaŭ.
«Kali vy kažacie «dypłamatyja», — ja tolki «za». Tolki dypłamatyju — ja b chacieŭ ubačyć kankretnyja kroki i kab heta było nie za košt 30% našaj dziaržavy i nie za košt našaha nasielnictva. Kali jość taki płan, — my tolki «za», — skazaŭ Zialenski.
Jon taksama zaznačyŭ, što Pucin choča viarnuć upłyŭ, jaki byŭ u Savieckaha Sajuza, ale jon hetaha nie zrobić.
«Jon užo nie paśpieje… Jamu ŭžo nie daduć ni hady, ni śviet… Užo ŭkrainskaje vojska maleńkaj kolkaściu zachodzić u jaho vobłaść i jon ničoha nie moža zrabić 20 dzion», — adznačyŭ prezident i dadaŭ, što Pucin «užo nie hulec».
Akramia taho, na pytańnie adnosna budučyni Samita miru Zialenski vykazaŭ mierkavańnie, što jon pavinien prajści, pažadana, u adnoj z krain Hłabalnaha poŭdnia.
«Jość krainy takija jak Saudaŭskaja Aravija i Katar, i takija krainy jak Turcyja, i Šviejcaryja taksama (ale heta inšy napramak), ale, zrešty, ź jakimi my viadziom pierahavory adnosna druhoha Samit miru», — skazaŭ jon.
Kiraŭnik dziaržavy dadaŭ, što jon padzialiŭsia z premjer-ministram Indyi Narendram Modzi mierkavańniem ab mahčymaści praviadzieńnia Samita ŭ hetaj krainie.
«Ale ja chaču być ščyrym. Heta tyčycca nie tolki Indyi, a luboj dziaržavy, jakaja stanoŭča staviłasia b da pryniaćcia druhoha Samitu. My nie zmožam pravieści Samit miru ŭ krainie, jakaja pakul nie dałučyłasia da kamiunikie Samitu miru. Ja dumaju, vy heta razumiejecie. Nichto ni na kaho nie ciśnie, ale heta łahična», — adznačyŭ Zialenski.
Zialenski raskazaŭ pra ŭkrainskuju rakietu-dron «Palanica»