Ci moža zabić tokam u mietro padčas mocnaj zalevy
Minski mietrapaliten patłumačyŭ, ci biaśpiečna na stancyjach u čas razhułu stychii.
26.08.2024 / 13:45
Zatapleńnie stancyi mietro «Uschod» u čas zalevy 18 lipienia. Skrynšot z tyktoka
Zaleva, jakaja adbyłasia ŭ Minsku 18 lipienia, stała, vidać, adnoj z najmacniejšych za ŭsiu historyju nazirańniaŭ. U čas niepahadzi zatapiła mnohija vulicy, a taksama stancyi mietro «Park Čaluskincaŭ» i «Uschod». Vada burnym patokam liłasia pa leśvicach na płatformy, ale zakryvać ich nie stali.
U mnohich uźnikła pytańnie, a ci biaśpiečna znachodzicca na płatformie, kali jaje zalivaje vada, a prosta pad joj prachodzić kantaktnaja rejka pad vialikaj napruhaj? U čas zalevy ciahniki praciahvali chadzić, a značyć napruhu z rejki nie zdymali. Biełarusy źviarnulisia z hetym pytańniem da samoha Minskaha mietrapalitena i atrymali ad jaho adkaz, jakim padzialilisia ŭ sacsietkach.
Adkaz Minskaha mietrapalitena. Fota z fejsbuka
U adkazie mietrapalitena patłumačyli, što dla strymlivańnia vady ŭ toj dzień zadziejničali vodaadliŭnyja ŭstanoŭki piešachodnych pierachodaŭ, bryzientavyja pieramyčki, miachi ź piaskom i hiermazatvory. Ale praź imklivaść raźvićcia padziej strymać vadu nie ŭtrymałasia i stancyi zatapiła.
Ale, jak adznačajuć u transpartnym pradpryjemstvie, nieabchodnaści ŭ zakryćci stancyj mietro nie było, bo vada z płatformy liłasia ŭ vodaadliŭny łatok pamiž chadavymi rejkami, a dalej praz drenažny kałodziež skidałasia taksama ŭ vodaadliŭnyja ŭstanoŭki. A sama kantaktnaja rejka raźmieščana niepasredna pad płatformaj i zakrytaja elektraizalacyjnym zaścierahalnym korabam.
Ale pry ŭźniknieńni pahrozy dla pasažyraŭ prymuć dadatkovyja miery — naprykład, zakryjuć stancyju i viestybiul i źnimuć napruhu z kantaktnaj rejki.
Kantaktnaja rejka ŭ aranžavym zaścierahalnym korabie pad krajem płatformy stancyi mietro «Kastryčnickaja». Fota: Anłajnier
A kali nie paśpiejuć svoječasova?
Napruha na kantaktnaj rejcy ŭ mietro dasiahaje 825 V, a siła toku — 3000 ampier. Dla čałavieka śmiarotnyja ŭžo 0,1 ampiera. Jana sapraŭdy znachodzicca pad płatformaj, ale kala samaha jaje kraju, tak što jaje moža zalivać vada, jakaja ściakaje z płatformy.
Elektraizalacyjny korab zaścierahaje rejku z troch bakoŭ, ale źnizu, dzie da jaje prymykajuć tokaprymalniki ciahnika, dziakujučy jakim jon i ruchajecca, rejka, naturalna, ničym nie prykryta.
Frahmient kantaktnaj rejki na padviesie. Častka pamiž padviesami ŭ zaścierahalnym korabie — bačna, što nižniaja častka zastajecca adkrytaj
Vyšynia pasažyrskaj płatformy ad uzroŭniu hałovak chadavych rejek składaje kala 1,1 m, ale kantaktnaja rejka, jakaja zvyčajna macujecca na admysłovych padviesach, raźmieščana značna nižej — ad hałovak chadavych rejek da nizu kantaktnaj rejki ŭsiaho kala 16 sm. Ci nie moža pry vialikaj raptoŭnaj pavodcy vada zatapić puci až da samoj kantaktnaj rejki?
U Supolnaści čyhunačnikaŭ Biełarusi dadatkova patłumačyli «Našaj Nivie», što ŭ mietro staić novaja sistema aŭtamatyki. Kali na stancyju chłynie patok vady, jaki moža ŭjaŭlać niebiaśpieku, stancyju zakryjuć i źnimuć napruhu z kantaktnaj rejki. Ale navat kali ŭjavić, što ŭsio zdarajecca imkliva — na stancyi niedaacanili maštab padtapleńnia i nie zakryli mietro, a nasosy nie spraŭlajucca adpampoŭvać vadu i vada padabrałasia da kantaktnaj rejki, — zdarycca karotkaje zamykańnie i za dolu siekundy aŭtamatyčna spracuje abarona. Padača toku na rejku spynicca.
Zaleva ŭ Minsku, vierahodna, była najmacniejšaj za ŭsiu historyju nazirańniaŭ
Stancyi minskaha mietro bolš nie budzie zataplać? Voś što pierarabili
U Minsku zatapiła i stancyju mietro «Uschod». Adnak zakryvać jaje nie stali VIDEA
Uvachod u mietro ŭ hłušy. Historyja adnaho z samych niezvyčajnych zdymkaŭ Minska