U Hłusku 15-hadovuju školnicu adpravili na dva hady ŭ śpiecvučylišča za abrazu milicyjanta
Dziaŭčynu-padletka abvinavacili ŭ tym, što jana źniała abraźlivaje videa i vykłała jaho ŭ internet.
23.08.2024 / 17:50
Ilustracyjnaje fota: Hienprakuratura
Spravu 15-hadovaj školnicy razhladaŭ Hłuski rajonny sud. Zajavu na dziesiacikłaśnicu padała rajonnaja kamisija pa spravach niepaŭnaletnich.
Kryminalnuju spravu raspačali paśla taho, jak školnica ŭ lutym 2024 hoda nibyta «šlacham vyrabu videarolika abraźlivaha charaktaru, raźmieščanaha ŭ hłabalnaj sietcy internet, ździejśniła naŭmysnuju abrazu pradstaŭnika ŭłady ŭ asobie supracoŭnika orhanaŭ unutranych spraŭ, heta značyć złačynstva, praduhledžanaje artykułam 369 Kryminalnaha kodeksa Respubliki Biełaruś», paviedamlajuć pravaabaroncy Mayday.
Na dumku kamisii, dziaŭčynka maje patrebu ŭ «asablivych umovach vychavańnia». U zajavie havorycca, što dziaŭčynka prapuskała ŭroki biez uvažlivaj pryčyny, z-za čaho jaje vyklikali na pasiadžeńni kamisii pa spravach niepaŭnaletnich.
Akramia taho, na školnicu skłali administracyjny pratakoł za abrazu dyrektara adnoj ź dziaržustanoŭ. Śledstva paličyła, što dziaŭčyna dziejničała z asabistaj niepryjaznaści.
Na sudzie i školnica, i jaje baćki admaŭlali ŭsie abvinavačvańni. Adnak sud vyrašyŭ, što «mietady prafiłaktyčnaha ŭździejańnia vynikaŭ nie dajuć» i «karekcyja jaje pavodzin nie moža być praviedziena pa miescy žycharstva».
15-hadovuju školnicu vyrašyli adpravić u śpiecyjalnuju ŭstanovu (pa sutnaści, «školnaja kałonija») terminam na dva hady. Skarha ŭ sud Mahiloŭskaj vobłaści vynikaŭ nie dała — rašeńnie zastałosia ŭ sile.