Biełaruskuju prapahandystku Maryju Piatraška ŭziali pracavać na rasijskaje telebačańnie
Ciapier jana raspaviadaje žycharam Rasii pra suśvietnuju infarmacyjnuju vajnu i zmovy kalektyŭnaha Zachadu. Ź biełaruskaha telebačańnia jana źnikła try miesiacy tamu.
22.08.2024 / 16:54
Maryja Piatraška na rasijskim TB. Skrynšot z repartažu kanała
Maryi Piatraška 28 hadoŭ. Jana minčanka. Z 14 hadoŭ pajšła na radyjo — supracoŭničała z radyjo «Kultura». Jana časta była hościaj prahramy «Mery Popins». Taksama rychtavała scenary dla telekłuba školnikaŭ.
U 2017 hodzie Piatraška skončyła fakultet žurnalistyki Biełaruskaha dziaržaŭnaha ŭniviersiteta. Trochu papracavała ŭ haziecie «Biełaruski čas», jakaja naležyć praŭładnaj Fiederacyi prafsajuzaŭ Biełarusi. Paralelna z BDU vučyłasia ŭ Maskoŭskim dziaržaŭnym univiersitecie.
Maryja Piatraška na vypusknym. Fota ź jaje staronki Ukantakcie
Jak kazali jašče ŭ 2020-m «Našaj Nivie» znajomyja dziaŭčyny, z Maryjaj mała chto siabravaŭ praz toje, što jana ličyła siabie vyšejšaj za inšych i chvareła na zornuju chvarobu. A na parach dziaŭčyna čaściakom siadzieła asobna ad astatnich.
Palitykaj, pa słovach surazmoŭcaŭ, Maryja tady nie cikaviłasia, ale chvaliła Uładzimira Pucina.
Z 2019-ha jana stała aŭtarkaj prajekta «Pakaleńnie BY» na «Biełaruś-1». U prajekcie raspaviadali pra roznych maładych talenavitych biełarusaŭ — navukoŭcaŭ, daśledčykaŭ, mastakoŭ i hetak dalej. Taksama načytvała naviny pra roznyja temy.
Piatraška biare intervju ŭ Alaksieja Vieniedziktava, tahačasnaha kiraŭnika «Echa Maskvy». Fota ź jaje staronki Ukantakcie
Jana stała viadomaj i paŭnavartasna trapiła ŭ efir u 2020-m hodzie, kali pieraklučyłasia na prapahandysckija repartažy. Piatraška plažyła prychilnikaŭ pieramienaŭ, a jaje ŭ jakaści ŭznaharody zaprašali na «Vialikuju razmovu z Łukašenkam», jakaja adbyłasia 9 žniŭnia 2021 hoda.
Taksama jana chadziła na hučnyja palityčnyja sudy — naprykład, prysud Ściapanu Łatypavu i Maryi Kaleśnikavaj dy Maksimu Znaku. Kali Łatypaŭ pierarezaŭ sabie horła, jana nazvała heta «pastanovaj». A na sudzie nad Kaleśnikavaj i Znakam spačatku nastojliva čaplałasia da jeŭrapiejskich dypłamataŭ, a paśla cytavała kamientary z prapahandysckich kanałaŭ, dzie ich nazyvali «fašystami» i patrabavali im termin «ad 50 hadoŭ».
Maryja Piatraška sprabuje dahnać pasła Hiermanii ŭ Biełarusi Manfreda Chuterera. Skrynšot ź videa BT
Pa źviestkach telehram-kanała «Karniki Biełarusi», pa stanie na 2021 hod Piatraška jeździła na šerym Porsche Cayenne. Na žal, u kanale nie napisana, na jakoj ź viersij aŭto — jano mahło kaštavać ad vaśmi da piacidziesiaci tysiač dalaraŭ.
Lubiła prapahandystka i pajezdki za miažu, u tym liku ŭ Jeŭropu. Apošniaje fota ź Jeŭrasajuza ź jaje sacsietak datujecca kancom 2021 hoda — tady jana była ŭ Šviecyi.
Maryja Piatraška ŭ Šviecyi. Fota ź jaje staronki Ukantakcie
Va ŭłasnym kanale, stvoranym u 2020-m, Piatraška publikavała miks ź biełaruskaj i rasijskaj prapahandy. Sprabavała rabić i ŭłasnyja nievialikija prajekty, ale vialikaj papularnaści jany nie zajmieli.
Ale jaje repartažy pierastali vychodzić na biełaruskim dziaržaŭnym telebačańni ŭ mai hetaha hoda. Tym časam, imavierna, jana ŭžo pierajechała ŭ Rasiju. Piatraška publikavała materyjały, naprykład, ź Pieciarburhskaha mižnarodnaha ekanamičnaha foruma dla niepapularnaha rasijskaha prapahandysckaha kanała «Ranak dobrym nie byvaje» z 2 tysiačami padpisčykaŭ.
Efir Maryi Piatraška z PMEF. Skrynšot ź jaje telehram-kanała
Užo kala miesiaca jana robić siužety ŭ prahramie «Vieści», jakuju robić rasijski prapahandyscki kanał Rasija-24. Asnoŭnyja jaje temy — prapahandysckija siužety pra žachi žyćcia na Zachadzie dy va Ukrainie dy kanśpirałohija pra mižnarodnyja arhanizacyi, jakija nibyta marać źniščyć Rasiju.
Taksama trochu bolš za miesiac tamu jana zapuściła prajekt PetrashkoNews i tyktoki pad nazvaj «Padsumujem?».
Novy prajekt Piatraška. Skrynšot ź jaje telehram-kanała
Niahledziačy na dobruju jakaść zdymki i mantaža, niama anijakach paznakaŭ pra datyčnaść da niejkaj struktury. Niezrazumieła, chto heta finansuje. U instahramie, naprykład, videa Piatraška biespaśpiachova raspaŭsiudžvaje adzin z ahrehataraŭ prapahandysckich rasijskich navinaŭ.
Na kanale Maryi kala 4500 padpisčykaŭ.
Prapahandystka Chudalej, jakaja pracavała na žanočych maršach, zvolniłasia z STB i šukaje pracu ŭ IT