Хабар 35 тысяч еўра, вячэра ў рэстаране сербскай кухні і пуцёўка на курорт: пачаўся суд над экс-намеснікам міністра энергетыкі
Міхаіл Міхадзюк курыраваў БелАЭС, а цяпер аказаўся на лаве падсудных за ўчыненне асабліва цяжкага карупцыйнага злачынства.
20.08.2024 / 12:48
Фота: Мінэнерга
У судзе Ленінскага раёна Мінска пачаўся суд над былым намеснікам міністра энергетыкі Беларусі Міхаілам Міхадзюком.
Экс-чыноўніка абвінавачваюць у здзяйсненні асабліва цяжкага карупцыйнага злачынства, яму пагражае да 15 гадоў калоніі, піша «Спутнік».
Абвінавачванне лічыць, што Міхадзюк браў хабар пры рэалізацыі найважнейшых інвестыцыйных праектаў Мінэнерга, якія ён курыраваў. Намеснік міністра лабіраваў інтарэсы прыватнай кампаніі пры закупцы еўрапейскага абсталявання для дзяржпрадпрыемстваў з сістэмы Міністэрства.
Па версіі следства, Міхадзюк з 2018-га па 29 снежня 2023 года атрымаў у некалькі этапаў хабару ў агульнай складанасці памерам 35 тысяч еўра. Таксама ён прыняў у Мінску сербскія дынары за спрыяльнае вырашэнне пытанняў, якія ўваходзяць у яго кампетэнцыю.
Акрамя таго, у якасці незаконнага ўзнагароджання Міхадзюк атрымаў ад камерцыйнай кампаніі «два квіткі» на вячэру ў рэстаране сербскай кухні, турыстычную паездку на сербскі гарналыжны курорт.
Пасля абвяшчэння абвінавачвання былы чыноўнік пагадзіўся даваць паказанні ў судзе і заявіў, што цалкам прызнае віну і раскайваецца. Ён нагадаў, што прапрацаваў у галіне 47 гадоў, у яго ёсць узнагароды ад найвышэйшага кіраўніцтва краіны, ад уплывовых міжнародных структур, у тым ліку профільных.
У пачатку судовага паседжання бок абарона прасіла змяніць меру стрымання для Міхадзюка, спасылаючыся на наяўнасць хранічных захворванняў. Пракурор у адказ нагадаў, што экс-чыноўніка судзяць паводле артыкула, які прадугледжвае 15 гадоў пазбаўлення волі, а ў СІЗА №1 ёсць медчастка. Суд у выніку абароне адмовіў.
Не задаволіў суддзя і хадайніцтва аб выдаленні з працэсу супрацоўнікаў СМІ. Суд праходзіць у адкрытым рэжыме.
Пра затрыманне Міхадзюка, які працаваў на пасадзе намесніка міністра энэргетыкі з 2005 года, стала вядома ў чэрвені падчас нарады ў Лукашэнкі.