Padarožža pa vuzkakalejcy, safary, hranitnyja skały… Top-8 niezvyčajnych turaŭ pa Biełarusi na vychadnyja
Kali hetym letam vy ŭžo pabyvali ŭ Miry, Niaśvižy, Breście i inšych vydatnych miescach, a ciapier chočacie čahości niebanalnaha i asablivaha, to hetaja padborka maršrutaŭ dakładna dla vas. Niezvyčajnyja pryrodnyja łakacyi, pajezdka pa vuzkakalejnaj čyhuncy, tury z animacyjaj, znajomstva z sabakami chaski, dehustacyi i navat vaśmidzionny račny kruiz. Usie padrabiaznaści raskazała vydańnie Myfin.by.
17.08.2024 / 17:08
Zdymak ilustracyjny. Fota: infoflot.com
Padarožža vuzkakalejnym šlacham
Kali nadakučyli zvyčajnyja ekskursii, samy čas pasprabavać niešta novaje. Možna prajechacca pa vydatnych «dzikich» miaścinach krainy pa vuzkakalejcy na maleńkim ciahniku.
Vuzkakalejek u našaj krainie zastałosia mienš za 30. Usie jany vykarystoŭvajucca dla pramysłovych metaŭ, u asnoŭnym dla transpartavańnia torfu. A ŭ apošnija niekalki hadoŭ arhanizoŭvajuć ekskursii pa vuzkakalejnaj čyhuncy.
Fota: 750mm.by
Akramia ramantyki samoha padarožža pa zapaviednych miescach, turystaŭ čakaje infarmatyŭnaja ekskursija. Vy daviedajeciesia i ŭbačycie, jak zdabyvajecca torf. Pa darozie možna budzie pahladzieć torfazdabyŭny ŭčastak «Krupka», «raźlivy» na miescy byłych torfaraspracovak, palavuju bazu «Jaŭsiejevičy», dzie ŭdzielniki tura paznajomiacca z torfazdabyŭnaj technikaj. Šmat jarkich emocyj i ŭražańniaŭ vam zabiaśpiečanyja.
Ekskursija pačynajecca niedaloka ad Lidy ŭ pasiołku Dzitva. Praciahłaść — 3,5 hadziny.
Košt: 50 rub. darosły bilet i 25 rub. dziciačy.
Safary na dośvitku
U hetym padarožžy prapanujuć adpravicca ŭ Nalibockuju pušču — vielizarny lasny masiŭ, raźmieščany niedaloka ad Minska. Arhanizatary tura abiacajuć sapraŭdnaje lasnoje safary: turysty buduć vysočvać i nazirać žyvioł, prysłuchoŭvacca i atrymlivać asałodu ad cišyni lesu.
Fota: poshyk.info
Šlach budzie pralahać pa lasnych darohach uzdoŭž kanałaŭ i zabałočanych učastkaŭ. Čaściej za ŭsio ŭ hetym tury atrymlivajecca ŭbačyć aleniaŭ, kazul i tarpanapadobnych koniej. Na siońniašni dzień kolkaść tarpanapadobnych koniej u lasach Nalibockaj puščy kala 250 asobin. Trochi radziej atrymoŭvajecca zaŭvažyć łasioŭ, lisaŭ, dzikoŭ, zubroŭ i inšych žyvioł.
Padarožža pačynajecca vielmi rana, tak kab pryjechać u lasny masiŭ na dośvitku. Heta pavialičvaje šancy panazirać za miascovymi nasielnikami.
Košt: 170-200 rub.
Salanyja šachty i hranitnyja skały
U hetym tury možna budzie ŭbačyć salanyja terykony i šachty adnaho ź lidaraŭ suśvietnaj vytvorčaści kalijnych uhnajeńniaŭ i hranitnyja skały najbujniejšaha karjera Jeŭropy. Turysty naviedajuć muziej AAT «Biełaruśkalij», salanyja terykony (Salihorskija hory).
Fota z adkrytych krynic
Sami arhanizatary tura ličać, što hetaje miesca idealna pasuje dla zdymak fantastyčnych filmaŭ pra dalokija płaniety abo śviet postapakalipsisu.
Druhaja častka maršrutu — naviedvańnie samaha vialikaha hranitnaha karjera ŭ Jeŭropie. Karjer na samaj spravie ŭražvaje svaimi maštabami. Tut zapłanavany pachod u muziej, naviedvańnie vytvorčych cechaŭ, račnoha porta i naziralnaj placoŭki nad 150-mietrovaj prorvaj. Mahčymy spusk na BiełAzie da vadaspadaŭ, što prabivajucca skroź skały karjera.
Košt: kali hrupa składajecca z 2-7 čałaviek, to za adnaho čałavieka košt składzie ad 214 rub., za hrupu 1498 rub. Pry kolkaści 8-19 čałaviek košt na čałavieka ad 106 rub., za hrupu — 2014 rub. Dadatkova apłačvajecca spusk da vadaspadaŭ u Mikaševičach i viačera na zvarotnaj darozie.
Animacyjny tur «Ściežkami partyzan»
Animacyjnaja ekskursija ŭ Stańkava pačniecca z prachodžańnia niamieckaha KPP. Turysty stanuć śviedkami pierastrełki z partyzanskim atradam i buduć mabilizavanyja na front, projduć kurs maładoha bajca i, viadoma, atrymajuć sapraŭdnaje bajavoje zadańnie.
Fota: altertour.by
Akunucca ŭ minułaje možna budzie na terytoryi vajskova-histaryčnaha kompleksu «Partyzanski łahier» u Stańkavie. Tut haściam abiacajuć sapraŭdnuju atmaśfieru partyzanskaha atrada. Udzielniki tura zmohuć, apranuŭšysia ŭ formu, prajści ŭsie vyprabavańni frantavoj padrychtoŭki, pabyvać u ziamlankach z radyjostancyjaj, kartami i šyfravalnaj mašynaj, naviedać zbrojevuju majsterniu, bytavyja ziamlanki, partyzanskuju łaźniu. A ŭ finale pabyvać na «frantavym śviacie» z tancami i muzykaj. Nu i biezumoŭna pasprabavać nievierahodna smačnuju sałdackuju kašu «z pyłu, z žaru» sa smačnymi zakuskami i napojami.
Košt: pry kolkaści 2-7 čałaviek u hrupie cana na adnaho — ad 320 rub., za hrupu — 2240 rub.
Hastranamičny tur z majstar-kłasam
Tur pra tajamnicy pivavaraŭ i syravaraŭ. Prahrama abiacaje być nasyčanaj. Spačatku turystaŭ čakaje ekskursija ŭ staražytnaje haradzišča na race Miency i siadzibu-muziej «Stary Miensk». Tut možna budzie ŭbačyć 500 ekspanataŭ X-XI stahodździaŭ: pradmiety pobytu, upryhožvańni, zbroja, tysiačahadovyja kryžy. Mnohija ź ich možna patrymać u rukach.
Haściam budzie prapanavana pradehustavać napoj, jaki pili połackija kniazi, — miedavuchu. Jaje pryhatujuć pavodle aryhinalnaha staražytnaha receptu.
Fota: dzen.ru
Nastupny punkt prahramy — siadziba ELAGMA, jakaja znakamitaja nie tolki svaimi chatkami-trykutnikami, ale i vytvorčaściu «pitnoj vady». U ramkach prahramy buduć praviedzienyja dva majstar-kłasy: pa pivavarstvie i pa pryhatavańni miakkaha syru. Sapraŭdnyja syravary pryadkryjuć zasłonu syravareńnia, raskažuć, jak pryhatavać syr doma na kuchni, padzielacca asabistymi nazirańniami i sakretami ŭ syrarobstvie.
U samym kancy čakaje adkaznaje zadańnie pa padrychtoŭcy miakkaha marynavanaha syru ŭ zaliŭcy z masła i śpiecyj. Na zakančeńnie pajezdki — čajavańnie z dehustacyjaj. Plus da taho kožnaha ŭdzielnika tura čakaje pryjemny padarunak — 1 litr «pitnoj vady», banačka syru, zroblenaja svaimi rukami.
Košt: 165 rub., dadatkova apłačvajecca abied na siadzibie (25 rub.).
U hości da Chaski
U hetym tury prapanujecca adpravicca ŭ Raŭbičy i Łahojsk. Tut unikalnyja pryrodnyja łandšafty susiedničajuć sa značnymi kulturnymi abjektami.
Fota: lapkins.ru
Naprykład, u Raŭbičach turysty naviedajuć muziej narodnaj tvorčaści, a ŭ Łahojsku — byłuju rezidencyju hrafaŭ Tyškievičaŭ.
Apošni punkt prahramy — siadziba «Dom kačeŭnika» (u vioscy Kaściuki Barysaŭskaha rajona). Tut na pryrodzie adnoŭlenyja tradycyi narodaŭ, jakija na praciahu stahodździaŭ mianiali miesca svajho žycharstva. Tam jość jurty i cipi. Turysty ŭbačać pryvitalny taniec z sapraŭdnymi indziejcami, daviedajucca ŭsio pra ład žyćcia i tradycyi kačavych narodaŭ, a jašče paznajomiacca z chaski — samymi pryjaznymi sabakami ŭ śviecie. Mora emocyj i vydatnyja fatahrafii ŭsim zabiaśpiečanyja.
Košt: ad 38 rub. (košt zaležyć ad kolkaści čałaviek u hrupie). Dadatkova apłačvajucca:
-
uvachodnyja kvitki ŭ muziej narodnaj tvorčaści ŭ Raŭbičach;
-
uvachodny bilet na siadzibu «Dom kačeŭnika» z pačastunkam (čaj, piečyva);
-
abied u kaviarni abo restaranie.
Vosień na Paleśsi
Nieprykmietna nabližajecca vosień, i jana asabliva pryhožaja na Paleśsi. U hetym tury prapanujecca adpravicca ŭ zakaźnik «Vyhanaščanskaje». Hetaja pryrodnaja terytoryja — kompleks niekranutych bałot, lasoŭ i azioraŭ.
Fota: ecojurney.by
Spačatku turystaŭ čakaje vodnaja prahułka pa voziery Babrovickaje. Padčas jaje zapłanavanyja prypynki, naprykład, na vostravie pasiarod bałot, a taksama na miescy, dzie žyvuć bałotnyja čarapachi. Paśla zapłanavany 6-kiłamietrovy pierachod pa vierchavym bałocie. Zaviaršajecca dzień kala vohnišča. Padčas viačorak supravadžajučy z boku zakaźnika prademanstruje praces pryvablivańnia vaŭka na huk (časam jany adhukajucca).
Načleh arhanizavany prosta na bierazie voziera. Heta były ŭradavy abjekt, mierkavanaja, ale nie spraŭdžanaja «palaŭničaja dača» Piatra Mašerava.
Na druhi dzień zapłanavanaja prahułka praź nizinnaje bałota pa naścile ź biarvieńnia. Hety tur spadabajecca amataram dzikaj pryrody i aktyŭnaha adpačynku.
Košt: 350-370 rub. (uklučanyja tranśfier ź Minska i nazad, dva abiedy, adna viačera, adzin śniadanak).
Kruiz na ciepłachodzie
Hety tur adroźnivajecca ad papiarednich tym, što tut turysty buduć padarožničać pa vadzie na ciepłachodzie, jaki kursiruje pa rekach Muchaviec, Pina i Prypiać.
Fota: fortuna-travel.ru
Padarožža pad nazvaj «Skarby Paleśsia» budzie doŭžycca 8 dzion. Maršrut pačynajecca i zakančvajecca ŭ Breście, prachodzić praź Lachavičy, Motal, Pinsk, Stachava, Davyd-Haradok, Turaŭ, Kačanovičy, Pinsk, Kobryn.
U ramkach prahramy zapłanavanyja 10 ekskursij z naviedvańniem raznastajnych muziejaŭ, pčalnika, biełaruskich vytvorčaściaŭ i znakamitaj Biełaviežskaj puščy.
Košt: ad 1839 rub., hramadzianam Biełarusi praduhledžanaja 5% źnižka. U košt uklučanyja čatyrochrazovaje charčavańnie i ekskursii na sušy.
Jakuju ekaściežku ŭ Biełarusi abrać dla padarožža vychadnoha dnia?
Top malaŭničych miescaŭ dla letnich vandrovak pa Biełarusi, dalej ad haradskoj zaduchi
Abjechali Biełaruś za čatyry hady: siamja naviedała ŭsie 118 rajonaŭ
Papularny polski treveł-błohier raskazaŭ pra svaju pajezdku ŭ Biełaruś i daŭ parady