Mienka ci Śvisłač? Navukoŭcy Akademii navuk, zdajecca, pastavili kropku ŭ dyskusii, dzie zaradziŭsia staražytny Miensk
Stalica Biełarusi moža być na niekalki dziesiacihodździaŭ starejšaja.
16.08.2024 / 15:02
Fota: BiełTA
Navukoŭcy Akademii navuk, zdajecca, pastavili kropku ŭ dyskusii, dzie zaradziŭsia staražytny Miensk. Pra heta paviedamiŭ BiełTA zahadčyk Centra archieałohii Biełarusi Instytuta historyi NAN Alaksiej Aŭłasovič.
«Viałasia navukovaja i hramadskaja dyskusija na temu taho, što źjaŭlajecca adpraŭnym punktam u farmiravańni budučaj stalicy niezaležnaj Biełarusi: miesca źlićcia Śvisłačy i Niamihi albo miesca, dzie ručaj Dunaj upadaje ŭ rečku Mienku. My viedali, što ŭ XI stahodździ isnavała dva pasieliščy i tam, i tam, abodva ŭmacavanyja, ale nie byŭ zrazumieły ich status, jak jany suadnosiacca adzin z adnym. I tolki archieałahičnyja daśledavańni nam pakazali, što dla kanca X — pieršaj pałovy XI stahodździa heta byli niesupastaŭnyja vieličyni.
U hety pieryjad na Miency byŭ sapraŭdny horad z cudoŭnaj materyjalnaj kulturaj, a na Niamizie choć i było pasielišča, ale ničoha takoha nie było», — raspavioŭ Alaksiej Aŭłasovič.
Fota: BiełTA
Tak, archieołahi znajšli na Miency šerah značnych artefaktaŭ kanca X — pieršaj pałovy XI stahodździa.
«Cudoŭnyja pajasnyja nabory pakazvajuć prysutnaść tut družyńnikaŭ. Vyjaŭleny i piśmovyja pryłady. Znojdziena taksama niekalki doncaŭ harškoŭ ź piačatkami kniažackaha tryzubca Iziasłava — starejšaha syna Uładzimira i Rahniedy. Heta pakazvaje tut prysutnaść kniažackaj administracyi i ŭ cełym pašyreńnie miežaŭ Połackaha kniastva.
Atrymlivajecca, što tut byŭ adzin sa značnych paŭdniovych haradoŭ na Połackaj ziamli, u toj čas jak na Niamizie ŭ pieršaj pałovie XI stahodździa ničoha padobnaha nie było. Tam sapraŭdy było pasielišča, ale takich statusnych rečaŭ tam na hety čas nie nazirajecca», — adznačyŭ navukoviec.
Fota: BiełTA
Dalej adbyłasia letapisnaja bitva 1067 hoda, kali kniazi Jarasłavičy prystupam uziali staražytny Miensk.
«I my bačym, što pačynajučy ź siaredziny XI stahodździa i ŭžo tym bolš u XII stahodździ na Miency bolš biednyja znachodki. Heta značyć horad zhasaje. A na Niamizie, naadvarot, druhaja pałova XI stahodździa i XII stahodździe prosta fantanujuć statusnymi rečami», — źviarnuŭ uvahu Alaksiej Aŭłasovič.
Fota: BiełTA
«Tak što my možam pastavić kropku ŭ hetaj dyskusii. Było dva pasieliščy. Adnak Minsk zaradziŭsia mienavita na Miency. A dalej adbyŭsia pieranos duchu horada na Niamihu ŭžo pry Hlebu Mienskim», — padsumavaŭ zahadčyk Centra archieałohii Biełarusi.
Jak paviedamlałasia, u 2022 hodzie premjer-ministr Biełarusi Raman Hałoŭčanka daručyŭ historykam razabracca, dzie mienavita zaradziŭsia Minsk. Dla hetaha byŭ składzieny płan archieałahičnych daśledavańniaŭ kompleksu na Miency.
U 2023 i 2024 hadach praca išła pad kiraŭnictvam archieołaha Andreja Vajciachoviča. Znojdzieny ŭnikalnyja draŭlanyja kanstrukcyi i artefakty, jakija dazvolili zrabić novyja vysnovy pra historyju biełaruskaj stalicy.