Były namieśnik ministra abarony Polščy: Čamu b nie pačać farmavańnie Biełaruskaha lehijona ŭ Polščy?
Z takoj prapanovaj u kałoncy ŭ vydańni Wprost.pl vystupiŭ eks-namieśnik ministra abarony Polščy, były kamandujučy polskimi suchaputnymi vojskami, hienierał-lejtenant u adstaŭcy Valdemar Skšypčak, piša «Radyjo Svaboda».
16.08.2024 / 09:12
Jon nahadaŭ, što ŭ Polščy ŭžo dziejničaje Ukrainski lehijon. U im hramadzianie Ukrainy prachodziać vajskovuju padrychtoŭku pierad tym, jak zaklučyć kantrakt z USU.
«My nie źjaŭlajemsia niepasrednymi ŭdzielnikami vajny va Ukrainie. My padtrymlivajem vajujučaha susieda ŭ miežach kaalicyi. My akazvajem dapamohu, siarod inšaha — navučańniem Ukrainskaha lehijona. Čamu b nie pačać farmavańnie Biełaruskaha lehijona?» — pytaje adstaŭny polski hienierał.
Jon piša, što ŭ Alaksandra Łukašenki «na rukach kroŭ tysiač niavinnych». Na jaho dumku, kali Pucin pasprabuje spynić vajennyja dziejańni va Ukrainie, adnoj z umovaŭ ustupleńnia ŭ pieramovy z udziełam Zachadu pavinna stać pieradača biełaruskaha dyktatara ŭ ruki mižnarodnaha trybunała.
«Polšča jak dziaržava, na jakuju napała Biełaruś, maje prava ŭdzielničać u źviadzieńni rachunkaŭ z kamandaj zabojcaŭ Łukašenki i, pierš za ŭsio, u paskareńni padzieńnia jaho režymu», — zaznačyŭ jon.
Były namieśnik ministra abarony Polščy miarkuje, što avanturyzm Łukašenki abumoŭleny tym, što ES pa-raniejšamu mała abmiažoŭvaje minski režym.
«Treba sabrać sotni brusielskich čynoŭnikaŭ i pryvieźci ich na našu miažu ź Biełaruśsiu. Moža być, heta zaachvocić ich zadumacca ab biaśpiecy i budučyni Jeŭropy», — prapanavaŭ Skšypčak.
Jon adznačyŭ, što «kolkaść hramadzianaŭ Biełarusi, jakija znachodziacca ŭ vymušanaj emihracyi, vialikaja».
«Va Ukrainie vajuje połk Kalinoŭskaha, nabrany ź biełarusaŭ. Što pieraškadžaje ES pačać stavić pierad Łukašenkam vyrazna peŭnyja ŭmovy?» — pytajecca Valdemar Skšypčak, zaklikajučy «vystavić Minsku rachunak za bandytyzm».