U nastupleńni ŭ Kurskaj vobłaści biaruć udzieł brytanskija tanki Challenger 2
Uzbrojenyja siły Ukrainy vykarystoŭvajuć zachodniuju vajskovuju techniku ŭ chodzie apieracyi ŭ Kurskaj vobłaści. Da hetaha času na kadrach i ŭ raskazach ź miesca padziej fihuravali braniravanyja aŭtamabili, takija jak amierykanski Stryker i niamiecki Marder. Adnak na rasijskaj terytoryi dziejničajuć i brytanskija tanki Challenger 2, piša The Moscow Times.
15.08.2024 / 16:06
Tank Challenger 2. Fota: Wikimedia Commons
Brytanskija tanki vykarystoŭvajucca ŭ chodzie apieracyi ŭ Kurskaj vobłaści, jakaja pačałasia 6 žniŭnia, skazaŭ SkyNews daśviedčany ŭ hetym čałaviek. Detalaŭ — kolki Challenger 2 vykarystoŭvajuć USU, kali mienavita tanki zajšli na rasijskuju terytoryju — jon nie pryvioŭ.
Ministerstva abarony Vialikabrytanii admoviłasia kamientavać apieratyŭnuju infarmacyju, ale zajaviła Sky News, što palityka Łondana ŭ dačynieńni da prymianieńnia Ukrainaj brytanskaj zbroi nie źmianiłasia — jana volnaja ŭ jaje vykarystańni ŭ tym liku na rasijskaj terytoryi.
Anałahičnaj pazicyi prytrymlivajucca dva inšyja asnoŭnyja pastaŭščyki vajskovaj techniki dla Ukrainy — Hiermanija i ZŠA. U pryvatnaści, kiraŭnik abaronnaha kamiteta Bundestaha Markus Fabier zajaviŭ tydzień tamu, što «paśla pieradačy zbroi Ukrainie jana stanovicca ŭkrainskaj», i heta tyčycca ŭ tym liku tankaŭ Leopard 2.
Krynica Bi-bi-si paćvierdziła, što Challenger 2 vykarystoŭvajecca ŭ Kurskaj vobłaści.
Da hetaha času tanki krain NATA traplali ŭ Rasiju tolki ŭ jakaści trafiejaŭ: u traŭni na Pakłonnaj hary ŭ Maskvie adkryłasia vystava zachoplenaj va USU techniki, siarod jakoj byli niamiecki Leopard 2 i amierykanski Abrams. Adnak brytanskaha Challenger 2 tam nie było.
Ukrainskija vojski prasunulisia ŭ Kurskaj vobłaści na 35 km
U pačatku bajoŭ u Kurskaj vobłaści rasijanie prymali ŭkraincaŭ za svaich
Rasija vyvodzić častku vojskaŭ z Ukrainy z-za bajoŭ u Kurskaj vobłaści
Bajden upieršyniu prakamientavaŭ bajavyja dziejańni ŭ Kurskaj vobłaści