Pratesty ŭ Banhładeš: premjer-ministr pakinuła krainu, natoŭp zachapiŭ jaje rezidencyju
U paniadziełak tysiačy ludziej uvarvalisia ŭnutr «Hanabchabana», rezidencyi premjer-ministra.
05.08.2024 / 12:43
Mužčyna płača, trymajučy na rukach zahinułaha ŭ pratestach. Fota: Rajib Dhar / AP
Premjer-ministr Banhładeš Šejch Chasina padała ŭ adstaŭku i pakinuła krainu na fonie masavych pratestaŭ, jakija pryviali da hibieli sotniaŭ ludziej. Jaje miescaznachodžańnie pakul nieviadomaje, piša Bi-bi-si.
U paniadziełak tysiačy ludziej uvarvalisia ŭnutr «Hanabchabana» — rezidencyi premjer-ministra.
Na hety momant niezrazumieła, chto staić na čale dziaržavy. Kamandujučy armijaj kantaktuje ź lidarami palityčnych partyj i ŭ bližejšy čas maje namier pravieści pres-kanfierencyju.
U niadzielu prynamsi 90 čałaviek zahinuli ŭ sutyknieńniach pamiž palicyjaj i ŭdzielnikami akcyj pratestu, jakija patrabavali adstaŭki Šejch Chasiny.
Siarod zahinułych — 13 palicejskich. Jany byli zabityja ŭ chodzie napadu na palicejski ŭčastak u horadzie Siradžhandž za 100 km na poŭnač ad stalicy krainy Dakka.
Studenckija pratesty z patrabavańniem admianić sistemu kvot na pracu ŭ dziaržsłužbie pačalisia ŭ lipieni. Za hety čas zahinuła bolš za 280 čałaviek.
U stalicy palicyja ŭžyła ślezaciečny haz i humovyja kuli dla razhonu mitynhoŭcaŭ, a premjer-ministr rasparadziłasia adklučyć mabilny internet u krainie.
78-hadovaja Šejch Chasina — dačka pieršaha premjera Banhładeš Mudžybura Rachmana (1971—1975), jaho samoha i ŭsiu siamju sa svajakami zastrelili padčas sproby pieravarotu ŭ 1975 hodzie. Usiaho tady zabili 20 členaŭ siamji Mudžybura Rachmana. Dźvie jaho dački tady byli za miažoj. Wikimedia Commons
Viarchoŭny kamisar AAN pa pravach čałavieka Folkier Ciurk zaklikaŭ ułady Banhładeš spynić hvałt.
Jon taksama vykazaŭ zakłapočanaść z nahody masavaha šeścia, jakoje zapłanavana ŭ stalicy na paniadziełak, i papiaredziŭ ab ryzycy dalejšaj eskałacyi.
«Urad pavinien spynić pieraśled tych, chto mirna ŭdzielničaje ŭ pratestnym ruchu, nieadkładna vyzvalić zatrymanych, adnavić poŭny dostup u internet i stvaryć umovy dla kanstruktyŭnaha dyjałohu», — zajaviŭ jon.