Litoŭski ministr rezka adkazaŭ na prośby rasijskich palitykaŭ nie ŭvodzić sankcyi suprać «prostych rasiejcaŭ»
Ministr zamiežnych spraŭ Litvy Habryelus Łandśbierhis aburyŭsia zaŭvahami rasijskich palitykaŭ, što sancyi niezasłužana bjuć pa prostych hramadzianach Rasii.
04.08.2024 / 16:02
Habryelus Łandśbierhis. Fota: «Radyjo Svaboda»
«Ja chacieŭ by źviarnucca da pytańnia ab tych «prostych rasiejcach», jakija «nie pavinny padviarhacca sankcyjam».
Ja čuju razmovy pra nievinavataść prostych rasiejcaŭ, ale zatym ja baču, jak prostyja rasiejcy zabivajuć prostych ukraincaŭ.
Ja baču, jak zvyčajnyja rasijskija maci raźvitvajucca sa svaimi zvyčajnymi rasijskimi synami i žadajuć im pośpiechu ŭ ich zvyčajnych rasijskich vajennych złačynstvach.
Ja baču, jak prostyja rasiejcy śviatkujuć zabojstva. Ja baču, jak zvyčajnyja rasijskija baćki prybirajuć svaich zvyčajnych rasijskich dziaciej u vajennuju formu i malujuć litaru Z na kardonnych kaściumach tankistaŭ.
Ja baču, jak zvyčajnyja rasiejcy źbirajucca razam, kab vystraicca ŭ vielizarnuju postać Z na haradskoj płoščy.
Zvyčajnaja Rasija chvoraja. Vylačeńnie budzie doŭhim i źniasilvajučym pracesam, jaki moža pačacca tolki tady, kali Rasija, a nie tolki Pucin, pacierpić parazu. Biez parazy va Ukrainie Rasija prosta praciahnie pašyracca.
Takim čynam, pra hetyja «niespraviadlivyja» sankcyi suprać «prostych rasiejcaŭ»… Što ž, usio, što zamarudzić tatalnuju vajskovuju mašynu Rasii, atrymaje padtrymku prostych litoŭcaŭ. Čaho b ni kaštavała pieramoha. Słava Ukrainie», — napisaŭ Łandśbierhis u tvitary.
Jaho słovy, imavierna, stali adkazam na pramovu rasijskaha apazicyjnaha palityka Uładzimira Kara-Murzy paśla vyzvaleńnia (jon byŭ adnym z tych palitviaźniaŭ, kaho vyciahnuli z turmy padčas niadaŭniaha abmienu pamiž Rasijaj i Zachadam).
«My bačym vielmi časta, što sankcyi zachodnich demakratyčnych krain akazvajucca nakiravanyja ŭžo nie suprać režymu Pucina i nie suprać kankretnych złačyncaŭ u vyšejšych šerahach režymu Pucina, a suprać usioj krainy, suprać usich rasiejskich hramadzian», — skazaŭ Kara-Murza i nazvaŭ heta «vielmi niespraviadlivym i kontrpraduktyŭnym», bo daje mahčymaść prapahandzie kazać pra toje, što vakoł vorahi.