Na Alimpijadzie lidzirujuć kitajcy, ale amierykancy ŭžo blizka. Biełarusy 23-ja
Skončyŭsia čarhovy dzień Alimpijady-2024, jaki prynios biełarusam jašče adzin, hetym razam srebrany miedal ad vieślara Jaŭhiena Załatoha. Na jakim biełarusy byli b miescy, kab vystupali nie ŭ niejtralnym statusie, a paŭnavartasnaj kamandaj?
04.08.2024 / 01:12
Tea Łafond, jakaja ŭpieršyniu ŭ historyi vyjhrała alimpijski miedal — i adrazu załaty! — dla nievialikaj astraŭnoj dziaržavy Daminika ŭ Karybskim mory. Fota: AP Photo/Matthias Schrader
Pieršaje miesca ŭ nieaficyjnym kamandnym zaliku ŭžo niekalki dzion utrymlivajuć kitajcy, jakija majuć na hety momant 37 miedaloŭ, ź jakich 16 załatych, 12 srebnych i 9 bronzavych.
Ale im u śpinu ŭžo mocna dychajuć amierykancy, jakija nieasprečna lidzirujuć pa ahulnaj kolkaści miedaloŭ (až 61), voś tolki załatych u ich pakul mienš — «tolki» 14, u toj čas jak 24 i 23 adpaviedna — srebranych i bronzavych.
Na trecim miescy z 41 miedalom (12+14+15) — haspadynia spabornictvaŭ Francyja, na čaćviortym — Aŭstralija z 27 miedalami (12+8+7), na piatym — Vialikabrytanija z 33 (10+10+13), na šostym — Paŭdniovaja Kareja z 21 (9+7+5).
Biełaruskija spartsmieny hetym razam vystupajuć jak niejtralnyja, sami za siabie, tamu ŭ aficyjnych tablicach, jakija viaduć arhanizatary hulniaŭ i spartyŭnyja statystyki, ichnija miedali zusim nie ŭličvajucca. Ale kali b uličvalisia — to biełarusy dzialili b 23-je miesca z Hruzijaj, u jakoj, jak i ŭ nas, na hety momant 3 miedali toj ža jakaści — 1 załaty i 2 srebranyja.
I heta, darečy, najlepšy vynik u paraŭnańni z usimi našymi susiedziami. Ukraincy ciapier majuć tyja ž try miedali, ale sastupajuć pa jakaści (1 załaty, 1 srebrany i 1 bronzavy) i zajmajuć 28-je miesca (biez uliku niejtralnych biełarusaŭ). U palakaŭ miedaloŭ 4, ale ź ich niama nivodnaha załatoha, tolki 1 srebrany, a 3 bronzavyja — u vyniku tolki 43-je miesca, jakoje dzielicca z Hrecyjaj. Litoŭka Viktoryja Siankucie zdabyła bronzu ŭ akademičnym viesłavańni, i hetaha chapaje dla taho, kab jaje krainie dzialić 57-je miesca z Aŭstryjaj, Hrenadaj, Jehiptam, Partuhalijaj i Słavakijaj. A voś u Łatvii pakul što nijakich uznaharod niama.
Z postsavieckich krain napieradzie ŭsich Azierbajdžan, u jakoha tolki 2 miedali, ale zatoje abodva załatyja. Ahulnaje jahonaje miesca — 18-je. Užo zhadanaja Hruzija z tryma miedalami (1+2+0) na «našym» 23-m miescy, Kazachstan z čatyrma (1+1+2) dzielić 26-je z PAR, Uźbiekistan z tryma (1+0+2) na 29-m, Małdova z Tadžykistanam z dvuma (0+0+2) dzielać 54-je na traich z Tajvaniem. Darečy, jak i raniej, va ŭsich hetych krain, aprača Kazachstana, usie ŭznaharody zavajavanyja vyklučna ŭ baraćbie dziudo, spabornictvy pa jakoj užo skončylisia. Kazachstanu dziudaisty prynieśli ŭ ahulnuju skarbonku tolki dva miedali, a jašče dva zavajavali strałki i himnast.
U Rasii, spartsmieny jakoj, jak i biełarusy, vystupajuć na hetaj Alimpijadzie ŭ niejtralnym statusie, uznaharod pakul niama, ale ŭ niadzielu adna dakładna źjaviccca, pytańnie tolki ŭ jakaści. Reč u tym, što jašče ŭ piatnicu tenisistki Dyjana Šnajder i Mira Andrejeva vyjšli ŭ finał žanočaha parnaha turniru i 4 žniŭnia zhulajuć u matčy za zołata ź italjankami Saraj Erani i Jaśmin Paalini. A heta harantavanaje jak minimum srebra.
Uviečary 3 žniŭnia, darečy, alimpijskija ŭznaharody ŭpieršyniu ŭ historyi zavajavali dźvie krainy, jakim dahetul heta nie ŭdavałasia, choć vopyt udziełu ŭ Alimpijskich hulniach naličvaje dziesiacihodździ. Heta astraŭnyja dziaržavy z Karybskaha mora — Daminika i Sient-Lusija.
Abiedźvie kriany dabilisia pośpiechu ŭ žanočaj lohkaj atletycy, prytym adrazu «niaścipła» ŭchapili pa zołacie. Žuljen Alfred ź Sient-Lusii vyjhrała prestyžnuju stomietroŭku, a Tea Łafond była najmacniejšaj u trajnym skačku. Abiedźvium spartsmienkam daviałosia dziela pieramohi pabić nacyjanalnyja rekordy, a Łafond była adzinaj sa spartsmienak, chto skočyŭ u hety viečar za 15 mietraŭ (15,02). Najbližejšaja supiernica adstała ad jaje na 15 santymietraŭ.
Viaślar Załaty vyjhraŭ srebra na Alimpijadzie i pieradaŭ pryvitańnie Krasnapollu
Biełaruski batutyst Ivan Litvinovič staŭ dvuchrazovym alimpijskim čempijonam
Biełaruska Vijaleta Bardziłoŭskaja — srebnaja miedalistka Alimpijady! Što viadoma pra jaje?