Čamu rasijskich palitviaźniaŭ vyzvalili, a biełaruskich nie? Usio prosta
Čamu rasijskich palitviaźniaŭ vyzvalili, a biełaruskich nie, pytajucca siońnia nas ludzi ź Biełarusi. Usio prosta, ale z adnym niuansam, piša Mikoła Buhaj.
02.08.2024 / 15:52
Alaksandr Łukašenka na samicie ŠAS 4 lipienia 2024 hoda. Fota presavaj słužby prezidenta Kazachstana
Pa sutnaści — tamu, što Pucin chacieŭ atrymać kilera Krasikava, a Łukašenka nikoha nie chacieŭ atrymać. Kryhiera niemcy pryčepam paprasili, canu hetamu niedareku — kapiejka. «Raz užo pajšła takaja pjanka, to addaj nam, Pucin, i Kryhiera» — «Nu, nacie vam i Kryhiera».
Taki prykład, kab jaśniej: čamu Bajden nie moža vyrvać izrailskich zakładnikaŭ u Chamasa? Tamu što Chamas nie choča addavać.
Ale i nakont Rasii: usiaho ŭ RF jak minimum 704 čałavieki palitviaźniaŭ, zabrać udałosia tolki sotuju dolu ad ich. Kali jašče kaho ŭdasca i jak — boh viedaje.
Histaryčna pa-roznamu rašałasia hetaje pytańnie. Mnohija niemcy krytykujuć rašeńnie Šolca, bo miarkujuć, što jano stymuluje Pucina na novyja palityčnyja zabojstvy na jeŭrapiejskaj ziamli, bo Kryhieraŭ i Hierškovičaŭ to jany nachapajuć u luby momant.
Ale adzinstva pa hetym pytańni niama. Tyja ž niemcy ŭ XX stahodździ nie tolki mianiali, ale i vykuplali palitviaźniaŭ z HDR za hrošy. Usiaho tak vykupili 33 755 palitviaźniaŭ. Akramia taho, za vykup HDR dazvoliła pierajechać na Zachad prykładna 250 tysiačam uschodnich niemcaŭ. Häftlingsfreikauf — pašukajcie na hetaje słova, kali chočacie pračytać bolš. Pakul nie zrazumieli, što tym samym zaachvočvajuć novyja aryšty.
Adzin palityčny niuans tut taki jość. Tak, Rasija — vialiki hulec, tamu i ŭvahi joj bolš, čym Biełarusi. Heta realnaść, jakaja była i budzie, narakać na jaje — jak na pryrodu.
Ale abmien z rasijanami daje bolšy šaniec na niejki patencyjny raźmien i z Łukašenkam — prosta tamu, što raz siuzeren tak zrabiŭ, značyć i vasał maje prava.
U kožnym razie, u hetym pytańni ŭsio zaležyć ad Łukašenki i ničoha, nul — ad nas z vami ci apazicyi.
Urešcie, samo rašeńnie pra masavyja palityčnyja represii samastojna Łukašenkam było pryniataje. Jon moh by, kali b chacieŭ, jašče ŭ 1990-ja zachavać Biełaruś niezaležnaj i demakratyčnaj, ale vybraŭ praściejšy dla siabie šlach — pradacca Maskvie i ŭstanavić dyktaturu. Ale navat taja dyktatura mahła b być biez masavych represij, jak była jana takoj da 2020 hoda, kali represii byli kropkavymi.
Jon moh i ŭ 2021-m abmiežavacca tym, što zdaryłasia ŭ 2006-2008-m ci 2010-2012-m. Dla zachavańnia ŭłady taho chapiła b, pratesty zhaśli da 2021-ha pry sutyknieńni z takimi represijami. Nie, jon vyrašyŭ pravučyć narod pa poŭnaj prahramie, pravučyć sotni tysiač ludziej. Što ž, heta byŭ jaho vybar, za jaki płacić i jašče zapłacić usia kraina, uvieś narod, a bolš za ŭsich — jon sam.
Pucin jašče raz patelefanavaŭ Łukašenku i padziakavaŭ «za dapamohu»
Niamieckija ekśpierty ličać abmien źniavolenymi niebiaśpiečnym precedentam
«Što da vykupu palitviaźniaŭ, to ideja nie novaja. Tak rabiła FRH u časy HDR»