Спартоўцы з КНДР і Паўднёвай Карэі зрабілі сумеснае сэлфі на Алімпіядзе ФОТА
Сумесны здымак спартоўцаў з дзвюх варагуючых краін ужо называюць адным з найважнейшых на Алімпіядзе ў Парыжы.
31.07.2024 / 14:26
Фота: Навінавае агенцтва Кітая
Майстры малой ракеткі з Паўднёвай Карэі і КНДР зрабілі сумеснае сэлфі пасля цырымоніі ўзнагароджання прызёраў алімпійскага турніру па настольным тэнісе ў змяшаным парным разрадзе.
Паўднёвакарэйцы Лім Чон-хун і Сін Ю-бін узялі бронзавыя ўзнагароды, перамогшы ў матчы за трэцяе месца пару з Ганконга. Срэбра дасталася паўночнакарэйцам Ры Чон Сік і Кім Кум Ён — у фінале іх абыгралі кітайцы Ван Чуцынь і Сунь Інша.
Падчас цырымоніі паўночнакарэйскія і паўднёвакарэйскія спартсмены абмежаваліся лёгкім поціскамі рукі і словам «віншую» на карэйскай. Аднак пасля ўручэння медалёў адзін з прадстаўнікоў Кітая прапанаваў зрабіць пераможнае сэлфі.
На Алімпіядзе ў Парыжы арганізатары дазволілі рабіць такія фота на тэлефон Samsung — афіцыйнага партнёра гульняў. Прадстаўнікі дзвюх Карэй пагадзіліся — і іх сумеснае сэлфі завірусілася ў інтэрнэце. У Паўднёвай Карэі гэтае фота назвалі «сапраўдным алімпійскім духам».
Спартсмены з КНДР аказаліся на п'едэстале Алімпіяды ўпершыню з 2016 года — Гульні ў Токіа яны прапусцілі праз пандэмію.
Сумеснае сэлфі з'явілася на фоне сур'ёзнай за апошнія дзесяцігоддзі эскалацыі ў адносінах паміж КНДР і Паўднёвай Карэяй. Пхеньян рэгулярна пасылае на поўдзень паветраныя шары са смеццем, у адказ паўднёвакарэйцы аднавілі прапагандысцкае радыёвяшчанне на мяжы.