U čaćvier u Maskoŭskim rajonie Minska pačniecca zbor zapaśnikoŭ, jaki praciahniecca try tydni
Z 1 pa 23 žniŭnia pad kiraŭnictvam kiraŭnika administracyi Maskoŭskaha rajona Minska projdzie navučalny zbor z vajennaabaviazanymi terytaryjalnych vojskaŭ rajona, paviedamlaje Minaabarony ŭ svaim telehram-kanale.
31.07.2024 / 13:08
Ilustracyjnaje fota Minabarony
Meta zboru: pavysić navyki słužbovych asob rajvykankama ŭ farmiravańni voinskich čaściej terytaryjalnych vojskaŭ, a vajennaabaviazanych — u vykanańni zadač.
Padčas zboru spłanavany:
- pryjom vajennaabaviazanych terytaryjalnych vojskaŭ i ich usiebakovaje zabieśpiačeńnie z vykarystańniem resursaŭ miascovaj bazy mabilizacyjnaha razhortvańnia;
- adnaŭleńnie navykaŭ kamandnaha składu ŭ kiravańni padparadkavanymi;
- padrychtoŭka vajennaabaviazanych da vykanańnia zadač u adpaviednaści z vajenna-ŭlikovymi śpiecyjalnaściami i słužbovym pryznačeńniem.