Амерыканскія астранаўты завіслі на арбіце і не могуць вярнуцца дадому
Місія, якая планавалася на тыдзень, зацягнулася на два месяцы. І невядома, калі скончыцца. У чым прычына?
30.07.2024 / 15:24
Бары Уілмар (злева) і Суніта Уільямс на Міжнароднай арбітальнай касмічнай станцыі. Фота: NASA via AP
Астранаўты NASA Бары Уілмар (Barry Wilmore) і Суніта Уільямс (Sunita Williams) знаходзяцца на Міжнароднай арбітальнай касмічнай станцыі з 6 чэрвеня, калі іх туды даставіла касмічная капсула Boeing CST-100 Starliner.
Гэты палёт — частка найважнейшых лётных выпрабаванняў, якія закліканы даказаць, што капсула бяспечная для перавозкі будучых астранаўтаў на Міжнародную касмічную станцыю і вяртання з яе.
Планавалася, што на станцыі Уілмар і Уільямс прабудуць тыдзень, але ўжо хутка будзе два месяцы, як яны там знаходзяцца. Як паведамляе Bloomberg, дата іх вяртання застаецца невядомай, бо NASA і Boeing расследуюць шэраг тэхнічных праблем, якія ўзніклі пры запуску Starliner. Сярод іх — уцечкі гелію і праблемы з рухавікамі.
Інжынеры NASA і Boeing нядаўна скончылі выпрабаванні рухавіка Starliner на зямлі на аб'екце NASA White Sands у Нью-Мексіка, каб даведацца, як апаратнае забеспячэнне можа паводзіць сябе на розных этапах палёту ў космасе.
Тэставанне паказала, што ўшчыльненні, зробленыя з тэфлону, могуць быць прычынай некаторых праблем з рухавіком.
Пасля правядзення дадатковых выпрабаванняў у космасе NASA і Boeing плануюць правесці маштабную праверку, магчыма, у канцы гэтага тыдня, каб вызначыць, ці гатовыя каманды даставіць Уілмара і Уільямс дадому на Starliner.
NASA і Boeing сцвярджаюць, што асноўны план заключаўся ў вяртанні астранаўтаў на Зямлю з дапамогай Starliner, але яны таксама разглядаюць рэзервовыя варыянты. Адной з магчымасцей з'яўляецца выкарыстанне касмічнай капсулы Dragon іншага камерцыйнага партнёра NASA — SpaceX.
У той жа час NASA паўторна сертыфікавала акумулятар Starliner на 90 дзён на арбіце ў параўнанні з першапачатковай сертыфікацыяй на 45 дзён. Гэта азначае, што пры неабходнасці капсула можа заставацца прыстыкаванай да станцыі да пачатку верасня.
NASA перапрацоўвае 98 адсоткаў мачы астранаўтаў на МКС у пітную ваду
4G-інтэрнэт павінен з’явіцца на Месяцы да канца гэтага года
Паглядзіце на пякельную «прыладу дэзарыентацыі», з дапамогай якой рыхтуюць астранаўтаў NASA
Кампанія Ілана Маска будзе спускаць з арбіты Міжнародную касмічную станцыю