Na vajnie va Ukrainie znoŭ zahinuŭ indyjec, jaki vajavaŭ za Rasiju
Svajaki śćviardžajuć, što mužčynu zavierbavali ŭ rasijskaje vojska padmanam.
29.07.2024 / 16:35
Ilustracyjnaje fota: Policía de patrullas de Ucrania via AP
Na vajnie va Ukrainie zahinuŭ indyjec, zavierbavany ŭ rasijskuju armiju.
Heta ŭžo piataja paćvierdžanaja śmierć hramadzianina Indyi na froncie za apošni čas, piša Bi-bi-si sa spasyłkaj na AFP.
22-hadovy Ravi Mun adpraviŭsia ŭ Rasiju ŭ studzieni, paśla taho jak pryvatny ahient pa pracaŭładkavańni paabiacaŭ jamu pracu ŭ śfiery transpartu.
Adnak na miescy jaho navučyli vałodańniu zbrojaj i ŭ sakaviku adpravili na front, raskazaŭ brat mužčyny Adžaj.
«Straciŭšy ź im suviaź, ja źviarnuŭsia ŭ ambasadu Indyi ŭ Maskvie, dzie nam paviedamili, što moj brat pamior», — adznačyŭ jon, dadaŭšy, što ambasada paprasiła siamju dasłać uzory DNK dla apaznańnia cieła Muna.
Svajaki taksama źviarnulisia pa dapamohu ŭ ofis premjer-ministra Indyi Narendry Modzi, kab viarnuć cieła na radzimu.
Na minułym tydni Ministerstva zamiežnych spraŭ Indyi zajaviła, što ŭrad praciahvaje pracavać z rasijskimi ŭładami, kab viarnuć kala 50 indyjcaŭ, jakija vajujuć u rasijskaj armii.
U pačatku lipienia stała viadoma, što rasijskija ŭłady pačali vypłačvać kampiensacyi siemjam hramadzian Indyi, jakija byli zavierbavanyja na vajnu i zahinuli tam. Hetaje pytańnie na sustrečy z Uładzimiram Pucinym padymaŭ niadaŭna Narendra Modzi.
Indyja zabiraje svaich hramadzian z vajny va Ukrainie
Rasija viarbuje ŭ svajo vojska maładych afrykancaŭ — Bloomberg
Rasija zavierbavała na vajnu suprać Ukrainy 200 niepalcaŭ, 14 užo zahinuli